Ekipa konjunta konklui investigasaun oknum PNTL tiru joven iha Lautém
DILI, 24 setembru 2023 (TATOLI) – Komandante Polísia Nasionál Timor-Leste (PNTL), Munisípiu Lautém, Superintendente Polísia. António Rêgo Fernandes, dehan ekipa konjunta ne’ebé kompostu hosi Departamentu Justisa no Inspetór Jerál Komandu Jerál PNTL konklui ona prosesu investigasaun ba kazu PNTL tiru joven ida iha Pairara foin lalais ne’e.
“Sim, ekipa sira ne’ebé mak forma hosi Komandante Jerál ne’ebé kompostu hosi Departamentu Justisa no Inspetór Jerál Komandu Jerál PNTL sira foin daudaun iha sábadu ne’e sira tún ona lokál krime hodi investiga kazu membru PNTL tiru joven ida iha Pairara. Sira konklui ona prosesu investigasaun iha domingu horseik no ha’u hanoin sira submete ona relatóriu investigasaun ba Komandu Jerál PNTL”, Superintendente Polísia, António Rêgo Fernandes, hateten, ba jornalista sira iha salaun CNE, segunda ne’e.
Nia dehan, ekipa Departamentu Justisa no Inspetór Jerál Komandu Jerál PNTL investiga ona Komandante Eskuadra Lautém Vila, Komandante Munisípiu Lautém rasik no membru sira ne’ebé momentu halo atuasaun.
“Sira investiga Komandante Eskuadra, membru sira ne’ebé momentu ne’e halo atuasaun inklui ha’u rasik hanesan Komandante Munisípiu. Ha’u labele dehan prosesu investigasaun ne’e por detallu, tanba segredu justisa”, nia adianta.
Iha ne’e, Superintendente Polísia Antonio Rego, haktuir kronolojia akontesimentu ne’e katak hahú iha 21/9, tuku 17:00, iha joven na’in-rua mai asiste futu manu, hafoin remata mosu diskusaun entre joven ho joven no iha ne’ebá, joven ida ne’ebé mak sente vítima la hato’o keixa ba polísia, maibé nia ba konvida fali nia maluk sira seluk.
Tanba nia (joven ) ne’e arte marsiál entaun nia alerta ba nia kolega sira iha Suku Pairara ho volume bo’ot depois sira mai halo ataka bairru Kaporu sira halo rahun tiha uma kuaze hitu.
Komunidade sira ne’ebé mak nia uma sai estragadu informa ba polísia no polísia mai hodi halo atuasaun. Ho nune’e bainhira PNTL sira tún iha fatin akontsimentu ne’e sira halai namkari.
Maibé tanba kalan, joven sira ne’e kontinua halibur malu iha fatin naran Hutunira, estrada bo’ot sira halo asaun insulta PNTL ho liafuan milísia no sira tuda inklui leno lampada ba polísia nian matan.
Tanba ne’e, mak PNTL husu sira hapara tiha hahalok sira ne’e hodi fahe malu, maibé joven sira kontinua asaun ne’e, sira hakilar fali polísia ne’e ho milísia depois tuda nafatin.
“Entaun sira tiru (adverténsia) ho intensaun atu ita-nia ema sira ne’e dook hosi fatin ne’ebá, maibé tanba haree ba ita-nia polísia ho membru na’in-lima de’it kompara ho massa sira ne’ebé mai, entaun sira tiru no ikus bala musan kona joven ida”, Antonio Rego dehan.
Nia dehan, tiru ne’e la’os se ba joven ne’e maibé sira tiru (adverténsia) haruka sira hamamuk fatin ne’e hodi labele halo asaun fila fali.
“Tuir relatóriu ne’ebé mak hosi ekipa sira ne’ebé mak momentu halo atuasaun iha terenu, sira iha membru ida mak tiru dala tolu no iha membru na’in-ida mak tiru dala haat, ne’ebé bala musan ne’ebé sira uza tiru ne’e iha hitu”, nia dehan.
António Rêgo Fernandes, hateten kona-ba públiku kestiona relatóriu ba kazu tiru joven ida iha Pairara ne’e normál, maibé ida ne’e relatóriu no ida ne’e mak faktus atu justifika.
Iha fatin hanesan, Ministru Interiór Francisco Guterres, husu ba Komadante Jerál atu halo investigasaun rigór ba membru sira ne’ebé momentu halo atuasaun iha terenu hodi rezulta joven ida hetan tiru.
Tanba PNTL ne’e iha regulamentu kontrolu ba arma bainhira halo atuasaun, kuandu viola ne’e iha sansaun disipliña atu aplika ne’e.
“Ita iha polísia rihun haat hosi ema na’in-rihun haat ne’e, iha ema ida sempre sala ne’e normál, maibé ita tenke investiga rigór hodi aplika pena. Ita labele halimar, ita tenke rigorozu”, nia afirma.
Jornalista : Natalino Costa
Editór : Zezito Silva
