Eskola EBF Defalasi Nahareka kontinua ho manorin na’in-ida desde tinan 2008
VIQUEQUE, 25 setembru 2023 (TATOLI)—Eskola Ensinu Báziku Filiál (EBF) Defalasi iha suku Nahareka, postu administrativu Ossu, munisípiu Viqueque desde estabalese to’o agora iha de’it manorin na’in-ida, nune’e difikulta prosesu aprendizajen.
“Eskola ne’e moris hahú tinan 2008 to’o mai ohin loron kontinua profesór manorin na’in-ida. Nune’e, bainhira profesór ne’e moras tenke abandona estudante to’o nia moras di’ak maka foin ba hanorin, problema ne’e uluk kedas no estudante sira mak hetan impaktu,” Diretór Ensinu Báziku Sentrál (EBC, sigla portugés) Nahareka, Guido Sequeira, hateten iha sede suku Nahareka, segunda ne’e.
Manorin ne’e loron-loron tenke hanorin estudante hosi klase 1 to’o 4 (primeiru siklu) ho matéria hamutuk sia.
“Loron-ida iha dadeer nia hanorin klase 1 no 2, meiu dia nia hanorin fali klase 3 no 4. Nune’e labele kontrola di’ak estudante sira. Ha’u esforsu husu beibeik ona ba Ministériu Edukasaun maibé seidauk iha resposta ruma. Ha’u husu ba hodi aumenta profesór atu labele difikulta estudante sira-nia prosesu aprendizajen, se Governu la aumenta maka estudante maka kontinua sai vítima,” nia akresenta.
Eskola EBF Defalasi hosi Eskola EBC Nahareka akumula estudante hosi aldeia rua Makabu’u no Mau Rate iha suku Nahareka.
Notísia relevante : Profesór na’in-ida de’it mak hanorin iha EBF Defalasi
Iha fatin ketak, Reprezenta estudante Eskola EBF Defalasi, Domingas da Silva, preokupa ho kondisaun ne’e tanba estudante sira ho idade kiik dalaruma simu matéria ladún másimu.
“Bainhira profesór ne’e moras labele hanorin estudante sira semana ida ka rua no dala ruma udan boot, anin boot profesór labele hanorin ami-nia oan. Tanba ne’e, Governu tenke rekruta profesór hodi reforsa hanorin ami-nia oan sira,” nia hato’o.
Xefe suku Nahareka, Nazário Soares Fernandes, husu ba Ministériu Edukasaun atu rekruta profesór hodi hanorin iha EBF Defalasi no presiza hadi’a edifísiu tanba daudaun kondisaun eskola a’at.
“Ita presiza Governu ninia intervensaun. Ha’u nu’udar autoridade lokál haree EBF Defalasi ho profesór ida desde uluk. Ha’u sente profesór na’in-ida labele hanorin estudante ho di’ak. Tanba ne’e, ha’u husu ba Governu atu aumenta profesór hodi hanorin estudante. Kondisaun eskola ne’e daudaun didin ne’ebé uza ai hahú a’at,” nia tenik.
Antes ne’e, Koordenadór no hanesan mós Profesór Eskola EBF Defalasi preokupa ho situasaun ne’e tanba bainhira nia halo viajen ba munisípiu seluk ka Dili maka laiha ona aula.
Nune’e, nia rasik aprezenta ona situasaun ne’e ba Antigu Vise-Ministru Edukasaun Juventude no Desportu, António Guterres, bainhira hala’o vizita ba eskola ne’e maibé laiha resposta to’o mandatu ramata.
Iha tinan 2022 akumula estudante totál hamutuk na’in-22 no tinan 2023 estudante hamutuk na’in-33.
Jornalista : Vitorino Lopes da Costa
Editora : Julia Chatarina
