Sekretáriu Jerál ONU kongratula PR Horta

DILI, 25 setembru 2023 (TATOLI) – Sekretáriu Jerál Organizasaun Nasaun Unidas (ONU), António Guterres, kongratula Prezidente Repúblika José Ramos Horta tanba povu fó fiar liuhosi eleisaun prezidensiál.

António Guterres hato’o kongratulasaun ne’e bainhira hasoru malu ho Prezidente Repúblika Horta iha Nova Iorke foin lalais ne’e.

“Sekretáriu Jerál António Guterres kongratula Prezidente Ramos Horta iha eleisaun no hato’o nia konfiansa ba futuru Timor-Leste nian”, hatete iha komunikadu ne’ebé Agência TATOLI asesu hosi media Gabinete Prezidensia Repúblika (GPR), ohin.

Durante enkontru, Guterres reforsa kompromisu ONU nian atu apoiu dezenvolvimentu Timor-Leste nian no servisu hamutuk ho nasaun ne’e hodi responde ba dezafiu sira.

Aleinde ne’e, iha reuniaun lider na’in-rua ne’e ko’alia mós kona-ba situasaun iha Timor-Leste, papél ONU nian iha nasaun ne’e no paizajen polítika globál.

Prezidente Ramos Horta hato’o nia apresiasaun ba apoiu ONU nian ba dezenvolvimentu Timor-Leste no hato’o fali nia kompromisu atu servisu hamutuk ho ONU hodi promove pás iha nasaun ne’e.

Jornalista: Hortencio Sanchez

Editór : Zezito Silva