Xefe Estadu partisipa simeira AOSIS iha Nova Iorke
DILI, 25 setembru 2023 (TATOLI) – Prezidente Repúblika, José Ramos-Horta, partisipa Simeira Líder Aliansa Estadu Ki’ik Insulár (AOSIS) ne’ebé hala’o iha sede Organizasaun Nasaun Unidas (ONU) Nova Iorke Estadus Unidus Amerika (EUA) iha ámbitu Asembleia Jerál ONU ba dala-78.
Aliansa Estadu Ki’ik Insulár (AOSIS) mak organizasaun intergovernamentál ne’ebé forma iha 1990. Reprezenta estadu ki’ik insulár no nasaun kostéiru ne’ebé ki’ik liu no vulnerável ba mudansa klimátika no nia impaktu ba oseanu.
“Maske kontribui menus hosi 1% ba emisaun gas estufa ne’ebé afeita globál, estadu sira ne’e mak afetadu liu hosi mudansa klimátika”, tenik iha komunikadu ne’ebé Agência TATOLI asesu hosi media Gabinete Prezidénsia Repúblika, (GPR), ohin.
AOSIS importante tebes iha formasaun polítika klimátika internasional, inklui rezultadu COP 23 no Akordu Paris.
Prioridade prinsipál mak atu asegura katak dalan emisaun globál aliña ho redusaun temperatura to’o menus hosi 1.5oC.
AOSIS mós foka ba dezenvolvimentu sustentável no konservasaun oseanu, rekoñese signifikadu área sira ne’e ba Estadu ki’ik insulár ne’ebé dezenvolve.
AOSIS sei kontinua buka kooperasaun internasionál no parseiru atu mantein nia kapasidade no harii kapasidade foun atu hadi’a dezafiu foun iha área xave sira ne’e.
Aliansa kompromete atu ajuda SIDS no estadu vulnerável seluk hodi hasa’e sira nia liafuan no halo impaktu ambientál, sosio-ekonómiku no geopolítiku ne’ebé kle’ur liu.
Jornalista: Hortencio Sanchez
Editór : Zezito Silva
