DILI, 26 setembru 2023 (TATOLI) – Diretór Armajenamentu Servisu Autónomu Medikamentu Ekipamentu Saúde (SAMES), Octavio Fernandes, dehan SAMES iha ona estoke aimoruk iha armajen ho 80% no stock out 20%.
“Ita-nia estoke aimoruk ne’ebé durante ne’e ita uza iha fasilidade saúde iha teritóriu nasionál hamutuk 328, maibé daudaun ne’e, iha ona estoke aimoruk ne’ebé disponivél iha armajen SAMES hamuutk 264 ka 80% no estoke mamuk 64 ka 20%”, Octavio Fernandes, informa ba TATOLI iha nia kna’ar fatin, ohin.
Nia dehan, aimoruk vitál hamutuk 97 mak hotu durante ne’e iha fasilidade saúde no estoke disponivél hamutuk 81 ka 84%, estoke mamuk 16 ka 16%. Aimoruk esensiál durante ne’e hamutuk 163, husi ne’e estoke ne’ebé mak disponivél hamutuk 130 ka 80%, estoke mamuk hamutuk 33 ka 20%. Nune’e aimoruk nesesáriu durante ne’e iha hamutuk 68, husi ne’e 53 ka 78% mak disponivél no estoke mamuk 15 ka 22%.
“Ekipamentu ba konsumaveis, laboratóriu, ekipamentu médiku, radiolojia, hemodialize, espesialista medisina, dentál, matan no ekipamentu oxijéniu ne’ebé durante SAMES halo akizisaun tuir fasilidade saúde ne’ebé utiliza mak produtu konsumaveis sira ne’ebé durante uza iha fasilidade saúde sira hamutuk 453, husi ne’e disponivél hamutuk 317 ka 70% no estoke mamuk hamutuk 136 ka 30%”, nia afirma.
Nune’e, estoke ne’ebé durante uza iha laboratóriu hamutuk 367, husi ne’e estoke ne’ebé disponivél hamutk 176 ka 48% no estoke mamuk hamutuk 191 ka 52%. Ekipamentu médiku ne’ebé durante uza iha fasilidade hotu iha Timor-Leste hamutuk 58 husi ne’e disponivél hamutuk 38 ka 66% no estoke mamuk 20 ka34%.
Produtu Radiolojia ne’ebé uza iha fasilidade saúde sira hamutuk 15, husi ne’e estoke disponivél 12 ka 80%, estoke mamuk 3 ka 20%. Produtu Hemodialise durante ne’e estoke hamutuk 11 husi ne’e disponivél hamutuk 8 ka 73% , estoke mamuk 3 ka 27%.
Produtu espesialista medisina durante ne’e hamutuk 58, husi ne’e estoke ne’ebé mak disponivél 34 ka 59% no estoke ne’ebé mak mamuk 24 ka 41%. Produtu dental durante uza iha fasilidade saúde hotu hamutuk 45 husi ne’e 41 ka 91% mak disponivél no estoke mamuk 4 ka 9%. Produtu ba Eye Consumable (matan) durante ne’e uza iha fasilidade saúde hamutuk 43 husi ne’e disponivél 2 ka 5% no estoke mamuk 41 ka 95% no ekipamentu oxijéniu durante ne’e 5 husi ne’e 5 mak disponivél ka 100% no estoke mamuk la iha.
Diretór Interinu Aprovisionamentu SAMES, Rafael Ximenes, informa durante fulan hira ba kotuk estoke barak mamuk iha fasilidade saúde hotu mak aprovizionamentu halo prosesu akizisaun tuir kategoria aimoruk nia mak hanesan vital, esensiál no nesesáriu.
“Entaun iha semana kotuk aimoruk hahú tama ona hanesan vitál hamutuk item 27, esensiál 16 item, nesesáriu hamutuk item 24, entaun ida ne’e ita bele dehan disponivél ona hodi responde ba fasilidade saúde sira ne’ebé mak aimoruk la iha”, Rafael Ximenes relata.
Nia esplika, ekipamentu médiku inklui aimrouk balun sei tama tan fulan outubru nia-laran atu nune’e bele garante to’o ba iha fulan dezembru.
“Kona-ba fasilidade saude sira-nia pedidu, ida ne’e SAMES durante ne’e instala ona m-suplay liuhosi online hodi utiliza iha kada fasilidade saúde bainhira aimrouk sira konsumaveis sira tama ona automatikamente pedidu ne’e liuhusi online depois aprova iha Diresaun Nasionál Farmasia no Medikamentu iha Ministériu Saúde no SAMES hafoin halo distribuisaun aimoruk ba kada fasilidade saúde sira” , nia konklui.
Jornalista : Felicidade Ximenes
Editór : Zezito Silva
