Governu partilla informasaun ijiene ordem públika iha Covalima
COVALIMA, 26 setembru 2023 (TATOLI)–Governu liuhosi Sekretáriu Estadu Asuntu Toponímia Organizasaun Urbana, Germano Santa Brites Dias, tersa ne’e, partila informasaun dekretu-lei númeru 33/2008, 27 agostu, kona-ba Ijiéne Ordem públika ba diretór munisipál sira iha Covalima.
“Vizita ida-ne’e atu fahe informasaun kona-ba servisu Toponímia liga dekretu-lei númeru 33/2008 haree ba ijiéne ordem públika hanesan fatin ne’ebé liga ho espasu públiku ita hotu kuidadu ho di’ak,” Sekretáriu Estadu Asuntu Toponímia Organizasaun Urbana hateten ba jornalista sira, iha salasaun AMC.
Governante ne’e esplika, espasu públika ne’ebé labele uza mak hanesan baleta, trotoar nune’e bee bele halai livre, jardin sira labele uza hodi faan sasán para motorizada no karreta nune’e hodi halakon funsaun jardin.
“Ita atu uza fatin públiku sira tenke husu autorizasaun iha munisípiu, nune’e bainhira uza fatin públiku labele prejúdika ita iha future,” nia dehan.
Tuir planu, hafoin finaliza hala’o enkontru ho diretór munisipal iha Covalima ekipa sei kontinua dezloka ba munisípiu Bobonaro
Iha enkontru ne’e, Reprezentante Administradór Munisípiu, Francisco de Jesus Alves mós relata servisu ne’ebé durante autoridade Covalima hala’o hanesan forma ekipa taskforce hodi hala’o patrullamentu ba komunidade nia animál ne’ebé husik livre iha estrada públiku.
“Servisu balun ita hala’o ona jestaun ba lixu hala’o penertiban ba merkadu no ekipa hala’o kontrola komunidade husik levre animál sira uza espasu públiku hala’o negóíu ita hala’o liuhosi ekipa taskforce,” nia hateten.
Ekipa taskforce ne’ebé autoridade Covalima forma ho nia membru husu autoridade protesaun sivíl, Bombeiru no sira seluk ho intensaun atu halo operasaun ba komunidade nia animál husik livre.
Jornalista : Celestina Teles
Editór : Cancio Ximenes
