OÉ-CUSSE, 26 setembru 2023 (TATOLI) – Ministériu Agrikultura no Peska (MAP) liuhosi Sekretáriu Estadu Pekuária, José Viera de Araújo, tersa ne’e hala’o enkontru ho Autoridade Rejiaun Administrativa Espesiál Oé-Cusse Ambeno (RAEOA) hodi halo levantamentu dadus kona-bá programa ‘habelar no habokur’ animal.
“Tán ne’e maka iha mai Oé-Cusse, tanba nonu Governu hakarak hasa’e produsaun ne’e ba iha tinan lima nia laran ba 20%, entaun ita halo liuhosi meiu levantamentu dadus mak ita bele hatene durante ne’e ita-nia progresu iha parte pekuária ne’e atinje to’o iha ne’ebé ona, ida-ne’e maka ita-nia servisu ba dahuluk, no vizita ba munisipíu hotu ona, ohin ne’e ikus iha Oé-Cusse,” Sekretáriu Estadu Pekuária, José Viera de Araújo, ba jornalista sira iha Gabinete ZEESM, Oé-Cusse.
Nia hateten, planu prioridade ba pekuária nian, ita hakarak prepara fatin oinsá kria sentru fomasaun animal, entaun liuhosi levantamentu dadus ne’e, ita haree pastajen komunál sira-ne’e.
“Entaun liuhosi sentru ida, para ita haree hatene katak animal orsida atu iha fatin ketak ida, tanba durante ne’e programa ida-ne’e ejiste ona, hanesan habelar no habokur, nune’e depois iha sentru ne’e maka estudante sira ka estajiádu sira bele ba aprende,” nia afirma.
Notísia relevante: MAECOM-RAEOA hametin kompromisu investe iha área pekuária
Iha fatin hanesan, Sekretáriu Rejionál ba Asuntu Agrikultura, José Eta, informa, durante iha enkontru ofisiál ne’e, autoridade RAEOA liuhosi Diresaun Rejionál Agrikultura, atualiza pontu importante tolu kona-bá animal nian.
Primeiru, oinsá atu hasa’e produsaun animal ho nia obstaklu sira, entaun iha Oé-Cusse, klaru, katak bazea sensu agrikola iha 2019, iha dadus kuaze rihun 200 animal eziste iha Oé-Cusse envolve uma-kain rihun 12 maka haki’ak animal.
“Ohin ita atualiza katak, programa cesta bázika iha faze primeiru no segundu, iha Oé-Cusse nia kontribuisaun maka animal liuliu karau, tanba karau ne’e sai sentru ba ema Oé-Cusse,” nia informa.
Daruak kona-bá, moras ne’ebé afeta animal sira, liu-liu ba fahi no bibi, maibé iha 2022 Autoridade rekruta doutór ida atu halo tratamentu ba animal sira, no fasilita mós formasaun no kapasitasaun téknika ba departamentu veterinária nian.
Terseiru maka kona-bá hahán animal sira iha Oé-Cusse sei iha problema, tanba iha tempu bailoro kuaze fatin hotu-hotu animal sira susar tebes atu hetan hahán, dalaruma bee-moos.
“Tan ne’e maka esforsa ne’ebé maka durante ne’e Autoridade halo, oinsa atu preserva bee, atubele sustenta nesesit’ariu animal iha Oé-Cusse liu-liu iha tempu bailoron,” nia katak.
Notísia relevante: Pekuária RAEOA vasina ona karau 819
Jornalista: Abílio Elo Nini
Editór: Evaristo Soares Martins
