DILI, 26 setembru 2023 (TATOLI)—Ministériu Obra Públika (MOP) sei forma ekipa task force hodi koordena ho Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P) hasai sedimentasaun sira iha fatin sira ne’ebé hanesan área risku ba inundasaun.
“Forma ona ekipa task force ida hamutuk ho IGEADI para haree sidimentasaun sira ne’ebé maka fó ameasa ba inundasaun iha Dili laran. Semana oin ami hahú normaliza iha mota ulun hodi hasai rai henek sira ne’ebé nakonu iha bee-dalan,” Ministru Obra Públika, Samuel Marçal, hateten iha edifísiu MOP, Caicoli, tersa ne’e.
Notísia relevante : MOP orienta IGE identifika mota risku inundasaun hodi normaliza
Governante ne’e rekoñese katak durante tinan barak ona la tau-matan ba mota sira, nune’e halo sedimentasaun nakonu iha mota laran no bainhira tempu udan mosu inundasaun iha fatin hotu iha Dili.
Tanba ne’e maka iha tempu bailoro ne’e, MOP konsentra normaliza foer iha baleta no mota laran.
“Mota sira ne’ebé fó ameasadu hamosu inundasaun ne’e sei normaliza hotu iha tempu badak, reeorganiza hela ekipamentu IGEADI nian, bainhira la to’o sei husu ajuda mós hosi empreza lokál,” nia salienta.
Aleinde ne’e, Governu planeia ona atu fui alkatraun ba estrada kuak sira iha Dili laran hodi evita rai rahun iha bairru tanba tuir dadus hosi Ministériu Saúde, daudaun moras Infesaun Bias Respiratóriu Aguda (ISPA) rejista a’as.
“Estrada urbana iha Dili laran ne’e, estrada Ailok-laran no fatin sira ne’ebé estrada kuak presiza halo dezeñu didi’ak. Iha tinan 2024 atu tau alkatraun hotu hodi evita foer hanesan karreta tama-sai bairru hodi lori foer tama ba estrada públiku, halo rai rahun barak no fó moras ba populasaun,” governante ne’e adianta.
Jornalista : Antónia Gusmão
Editora : Julia Chatarina
