OÉ-CUSSE, 27 setembru 2023 (TATOLI) – Sekretáriu Estadu Kooperativa (SEKoop), Arsénio Pereira da Silva, informa, kooperativa hanesan baze ekonómia rai laran, nune’e parte SEKooop prioritiza asuntu kapasitasaun ba jerente kooperativa sira iha territóriu nasionál hodi fasilita formasaun kona-bá jestaun no atendimentu ba produsaun iha Orsamentu Jerál Estadu (OJE) 2024.
“Sira-ne’ebé ha’u vizita, balu seidauk hetan apoia hosi hosi Governu anteriór no agora, maibé balu hetan ona, ba oin, ha’u sei haree ne’ebé maka nesesita liu, tanba hanesan sira-ne’ebé iha dezenvolvimentu di’ak ona, ha’u hanoin prioridade sira-ne’ebé seidauk la’o di’ak,” Arsénio Pereira da Silva, ko’alia bainhira hala’o vizita iha kooperativa KOMELI iha Palaban Oé-Cusse, tersa ne’e.
Hanesan fasilita treinamentu liu-liu kona-bá jestaun accounting nian, sira-ne’ebé iha produsaun oinsa halo produsaun barak liga ba sira-nia orsamentu, tan ne’e maka SEKoop ho ekipa mai haree direitamentu atu haree saida mak atu halo iha tempu oin mai.
Notísia relevante: SEKoop hahú elabora planu importante tolu
Governante ne’e informa, durante iha sorumutu ho kooperativa sira iha Oé-Cusse, parte SEKoop simu pedidu, rekomendasaun sira kuaze hanesan, balu husu atu halo estudu komparativu hodi aumenta skill koñesimentu ba kooperativa ne’e rasik, entre lokál no internasionál, no mós husu atu apoia kona-bá fasilidade ba atendimentu membru ba iha fatin propriu.
“Maibé ha’u hanoin tinan oin kuandu OJE 2024 aprova, ita sei halo jestaun la’ós apoia iha Oé-Cusse de’it maibé iha territóriu laran tomak, tanba ita iha kapasidade tékniku sira iha atu fasilita formasaun ba iha kooperativa bázika accounting ba iha prosesamentu no produsaun no asuntu seluk-tán, ida-ne’e ita tau prioridade iha iha OJE 2024,” nia promete.
Prezidente Kooperativa Meusine Lifau (KOMELI) Manuel Tolan, agradese ba vizita ne’e, atu bele haree direitamente funsionmantu ba kooperativa sira iha Oé-Cusse, nune’e bele hadi’a ekonomia iha Oé-Cusse.
“Ami-nia kooperativa ne’e harii iha 2004, hahú ho ema na’in-15, feto na’in-neen no mane na’in-sia, to’o agora iha membru hamutuk na’in-69, ativu ne’e 67, no la ativu na’in-rua, agora daudaun ami-nia kapitál hamutuk $79,589.69,” nia informa.
Nia hateten, kapitál ne’ebé oferese hanesan imprestimu ka reimbolsa, kada fulan bele hatama fali funan ho nia fundus ba kooperativa para bele fó tan opurtunidade ba membru seluk, no osan ne’ebé asesu, balu uza ba eskola, balu uza ba atividade negósiu no seluk-tán,
Tuir nia difikuldade ne’ebé sira, infrenta kona-bá fatin enkontru ka edifísiu seidauk iha, maibé tuir KOMELI nia kbiit, daudaun ne’e prepara ona rai
“Ohin ha’u mós relata mínimu hasa’e kapasitasaun ba rekursu umanu, fasilita formasaun ba membru sira, nune’e hotu-hotu bele hatene lala’ok kooperativa nian,” nia katak.
Notísia relevante: KOMELI husu SEKoop apoiu finansiamentu atu harii sede kooperativa
Jornalista: Abílio Elo Nini
Editór: Evaristo Soares Martins
