Autoridade Covalima inaugura kooperativa “Halibur Fini Batar no Hare”
COVALIMA, 27 setembru 2023 (TATOLI)–Reprezentante Administradór Covalima, Agostinho Mendonça “Ran Nakali”, kuarta ne’e, inaugura edifísiu kooperativa Halibur Fini Batar no Haree iha suku Lepo, postu administrativu Zumalai, munisípiu Covalima.
Kooperativa Halibur Fini Batar no Hare ho nia membru na’in-10 ne’ebé estabelese hosi veteranu grau 0-3 no 4-7 ne’ebé fundu hosi konsellu veteranu ne’ebé hetan apoiu hosi Servisu Apoiu Sosiedade Sivíl no Auditoria Sosiál (SASCAS) atu hakbiit veteranu sira-nia ekonómia família.
“Ohin, ha’u mai iha ne’e atu hala’o inaugurasaun kooperativa Halibur Fini Batar no Hare no hodi hala’o lansamentu entrega fini batar no hare,” Reprezentante Administradór Covalima ne’e hateten iha nia diskursu iha suku Lepo, postu Zumalai.
Hafoin hala’o inaugurasaun ba kooperativa ne’ebé veteranu ho grau 0-3 no grau 4-7 sosa fini hosi agrikultór hodi rai iha kooperativa, nune’e kooperativa bele faan fali ba Ministériu Agrikultura no Peska atu distribui ba agrikultór sira.
Reprezentante Prezidente Konsellu Veteranu Covalima, Joaquim Barros, hateten prosesu fó apoiu fundu tanba inisiativa hosi Prezidente Konsellu Kombatente Libertasaun Nasionál hasoru eis Primeiru-Ministru, Taur Matan Ruak, hodi husu apoiu fundu hamutuk $38,641ba veteranu grau 0-3 no 4-7.
Veteranu sira grau 0-3 no 4-7 estabelese grupu mak hanesan grupu ida foku haki’ak karau ne’ebé estabelese iha suku Ogues, postu administrativu Maucatar no grupu kooperativa Halibur Fini Batar no Hare estabelese iha suku Lepo, postu administrativu Zumalai, munisípiu Covalima.
Fundu ne’ebé apoiu ba veteranu ne’ebé mai hosi SASCAS ba Konsellu Veteranu Covalima hamutuk $38,641 ne’ebé hodi fó apoiu ba atividade sira hanesan apoiu ba atividade ekonómia no mós ba edukasaun.
Fundu $38,641 ne’ebé aloka orsamentu ho montante $20.000 fó apoiu atividade ekonómia ne’ebé estabelese ona grupu rua no kada grupu hetan apoiu orsamentu $10.000 no orsamentu $10.000 fó apoiu edukasaun ba estudante na’in-20.
“Apoiu ne’e ho intensaun atu hakbiit veteranu sira-nia ekonómia,” nia dehan.
Koordenadór Grupu Kooperativa Halibur Fini Batar no Hare, Justino dos Reis, hateten maske hasoru dezafiu maibé membru balun sira-nia pensamentu la hanesan hakarak fahe osan de’it, maibé ohin loron bele hala’o inaugurasaun.
“Liuhosi grupu kooperativa atu hakbiit ami-nia ekonómia família uma-laran no bele selu ba ami-nia oan sira-nia eskola,” nia hateten.
Veteranu grau 0-3 no 4-7 estabelese kooperativa Halibur Fini Batar no Hare iha tinan 2022 ho nia membru na’in-10 ne’ebé kompostu hosi feto na’in-rua (2) no mane na’in-10.
Jornalista : Celestina Teles
Editór : Cancio Ximenes
