DILI, 27 setembru 2023 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu rezolusaun Governu, ne’ebé aprezenta hosi Ministru Interiór, Francisco da Costa Guterres, ba reintegrasaun pesoál ho funsaun Polísia Nasionál Timor-Leste (PNTL).
“Ho hanoin katak dignifikasaun sentidu servisu PNTL nian importante tebes ba funsionamentu efikásia no manutensaun konfiansa hosi públiku iha instituisaun ne’e, ba fortalesimentu morál no komprometimentu hosi Polísia sira ne’ebé pozitivamente influénsia kualidade servisu ne’ebé sira fó ba komunidade,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Diploma ne’e hakarak atu rezolve kestaun membru PNTL na’in-158, ne’ebé antes ne’e despede hodi filafali bá vida sivíl, ne’ebé Governu atuál konsidera la tuir prosedimentu loloos no iha irregularidade
Notísia relevante : Xanana: “Komandante PNTL hasai sira na’in-158 la tuir prosedimentu”
Nune’e, liuhosi reuniaun ezekutivu, Governu reintegra filafali membru Polísia hirak ne’e no fó kompensasaun ba sira-nia tempu ne’ebé durante hala’o iha tempu apozentasaun, ne’ebé tuir ho sira-nia montante remunerasaun baze mensál no suplementu remuneratóriu sira ne’ebé sira tenke hetan bainhira sira seidauk tama ba situasaun reforma, ho deskontu ba montante ne’ebé benefisiáriu kompensasaun simu hanesan pensaun ferik-katuas nian.
Períodu tempu iha ne’ebé profisionál sira-ne’e mantein iha situasaun apozentasaun nian maka konta hanesan fó ona estadu ativu ba efeitu remunerasaun, férias, progresaun, promosaun no apozentasaun.
Iha loron 16 juñu 2023, Komandu PNTL ofisialmente despede membru 158 ba vida sivíl, ne’ebé serimónia despedida prezide direta hosi Komandante Jerál PNTL, Komisáriu Jerál Herique da Costa no hetan akompañamentu hosi Segundu Komandante Jerál PNTL, Komisáriu Pedro Belo.
Tuir estatutu pesoál PNTL lei númeru 69/2022, 28 setembru iha artigu 128, membru ne’ebé tama ba reforma ka aprezentasaun ou pasajen mak sira ne’ebé ho idade 60 ona. Aleinde ne’e, bainhira membru ida mak fízika no psikolójikamente labele halo ona funsaun hanesan membru Polísia, entaun bele tama ba reforma.
Nune’e mós, iha artigu 129 hosi estatutu pesoál PNTL fó dalan iha loron 30 abríl, Komandu Administrasaun tenke submete lista ba Gabinete Komandante Jerál PNTL atu halo publikasaun ba Jornál Repúblika.
Ho baze lei estatutu pesoál PNTL, maka hahú loron 14 novembru 2022, Departementu Administrasaun Komandu Jerál PNTL manda lista ba Gabinete Komandante Jerál. Hosi ne’ebá enkamiña ba Gabinete Ministru Interior hodi informa situsaun kona-ba membru sira ne’ebé tama ba reforma.
Iha loron 22 marsu, ofísiu ida hosi Gabinete Ministru Interiór husu atu kompleta dadus sira kona-ba saláriu, postu kada membru ne’ebé tama ba reforma, inklui saláriu désimu terseiru atu manda ba Institutu Seguransa Sosiál (INSS) atu halo kontajen ba membru PNTL ne’ebé reforma atu hetan diretu hira.
Tanba ne’e, mak iha 05 maiu halo publikasaun iha Jornál Repúblika, membru PNTL na’in-158 tama ona ba pasajen reforma.
Jornalista : Antónia Gusmão
Editora : Julia Chatarina
