iklan

EKONOMIA, MUNISÍPIU, VIQUEQUE

SEP koordena ho Servisu Agrikultura Viqueque rekolla dadus peska no agrikultura

SEP koordena ho Servisu Agrikultura Viqueque rekolla dadus peska no agrikultura

Atividade koordenasaun serbisu entre Sekretáriu Estadu Peska, Domingos da Conceição dos Santos, no ekipa, ho kargu xefia no funsionáriu Servisu Agrikultura Viqueque, iha salaun, Beloi, kuarta (27/09/2023). Imajen Tatoli/Vitorino Lopes da Costa

VIQUEQUE, 27 setembru 2023 (TATOLI)Sekretáriu Estadu Peska (SEP), Domingos da Conceição dos Santos, no ekipa, kuarta ne’e, koordena ho Servisu Agrikultura Viqueque hodi rekolla dadus iha área peska no agrikultura hodi tau ba programa prioridade tinan 2024.

“Ohin ami mai munisípiu Viqueque hodi halo koordenasaun ho Servisu Agrikutra sira hodi rekolla dadus iha área peska no agrikultura. Purtantu ita atu haree atividade iha sentru produsaun hakiak na’in sira-nia fó rendimentu ba sira ka lae ka la’o ladi’ak, karik ita bele hatene. Tanba ne’e, ita presiza akumula hotu dadus hodi bele elabora programa ba tinan 2024 nian,” Sekretáriu Estadu hateten ba Agência Tatoli, hafoin ramata enkontru ho funsionáriu Servisu Agrikultura Viqueque, iha edifísiu, Beloi, kuarta ne’e.

Governante ne’e konsidera, elaborasaun dadus importante hodi tau ba planu, tanba durante ne’e kestaun dadus sai problema. Ho objetivu ida-ne’e maka Sekretáriu Estadu tun direta ba  Servisu Agrikultura munisipál hodi aumeta referénsia dadus hodi fasilita hatene programa prioridade no alokasaun orsamentu.

“Tanba aprezenta orsamentu, ita bá la’ós ho montante orsamentu, maibé ita tenke aprezenta programa ne’ebé di’ak maka foin hatúr orsamentu tuir programa sira-ne’ebé ita trasa,” nia akresenta.

Notísia relevante : Governu sei distribui bero fiberglass ba peskadór sira iha Viqueque

Governante ne’e aproveita halo vizita ba sentru viveiru sira hodi identifika problema.

“Ami presiza rona problema saida de’it maka hakiak na’in sira hasoru. Atu hatene mós rendimentu produsaun, tanba ita-nia mehi mak hakarak hasa’e produsaun setór peska hodi redús importasaun sira,” nia subliña.

Iha fatin hanesan, Diretór Servisu Agrikultura Viqueque, Fernando Joaquim, agradese ba Sekretáriu Estadu  onekipa ne’ebé bele haree direta kondisaun hodi hatene preokupasaun sira durante ne’e.

“Ami menus forsa traballu, munisípiu Viqueque poténsia ba peska maibé presiza reforsa rekursu hodi akompaña no fó asistensia ba atividade sira,” nia relata.

Tuir dadus provizóriu peska iha Viqueque, estabelesimentu sentru viveiru hamutuk 12, grupu hakiak ikan iha 82 no área pontensiál bee-matan hakiak ikan iha 41.

Funsionáriu iha Servisu Agrikultura Viqueque hamutuk na’in-157, kompostu hosi permanente 87, ajente 41 no kazuál 29.

Jornalista     : Vitorino Lopes da Costa
Editora          : Julia Chatarina

iklan
iklan

Leave a Reply

iklan
error: Content is protected !!