OÉ-CUSSE, 28 setembru 2023 (TATOLI) – Diresaun Rejionál Agrikultura, Rejiaun Administrativa Espesiál Oé-Cusse Ambeno (RAEOA), aloka $9,120.00 hodi kompra fini atu apoia ba agrikultór sira iha Oé-Cusse hodi prepara kuda ba époka 2024.
Xefe Departamentu Agrikultura Bázika Familiár, Angelo do Rosário, informa, fini ne’ebé atu apoia mak batar Noimutin, shorgum, hare-metan, foremungu, forerai, koto-mean, ai-farina no ortikultura.
“Tanba estoke fini daudaun ne’e la sufisiente, atu fornese ba agrikultór sira-ne’ebé kbiit laek, liuliu batar, hare metan, fini hirak-ne’e prepara ba époka 2023 no 2024,” Angelo Ddo Rosário, ko’alia iha Oé-Cusse, kinta ne’e.
Prosesu kompra fini ne’e liuhosi konkursu públiku, no daudaun ne’e rezultadu konkursu públiku publika ona, hein de’it atu selebra kontratu, nune’e kompaña bele fornese mai diresaun, atu departamentu bele identifika no halo distribuisaun ba agrikultór sira.
“Distribuisaun ne’e sei kabe ba sub-rejiaun haat, suku 18 iha Oé-Cusse, maibé prioridade ba kbiit laek, la’ós hotu-hotu atu hetan, maibé ita sei identifika ne’ebé maka laiha kbi’it atu asesu ba fini, tanba programa ne’e realiza kada tinan, ezemplu balu tinan kotuk hetan ona, entaun tinan ne’e ita muda fali ba agrikultór seluk, ne’ebé maka seidauk hetan,” nia katak.
Tuir nia, apoia ne’e mós ba grupu sira, maibé depende fali hosi kuantidade fini, hanesan hare metan bele determina ba grupu, batar kuaze ein-jerál, kona-bá foremunggu diresaun sei deside, la’ós hotu-hotu hetan, maibé sira-ne’ebé iha inisiativa atu kuda entaun sei hetan apoia uitoan.
“Ha’u hanoin tinan ne’e la tarde, tanba kompañia manán-na’in iha ona, sei prosesu to’o outubru, bele halo ona distribuisaun, maibé bazea proposta mai hosi agrikultór sira, karik tarde sei husu apoia hosi estensionista suku atu identifika no submete dadus kada suku benefisiáriu hira mak hetan fini ne’e,” nia katak.
Entretantu, kompañia atu kompra fini hirak-ne’e, hosi kompañia Phiefil-Pietama Furak Unipesoál Lda, ho kustu $9,120.00.
Jornalista: Abílio Elo Nini
Editór: Evaristo Soares Martins
