DILI, 28 setembru 2023 (TATOLI)—Prezidente empreza East Timor Trading, Sakib Awan, kinta ne’e, hasoru malu ho Primeiru-Ministru (PM), Kay Rala Xanana Gusmão, hodi relata planu investimentu.
“Ami halo daudaun projetu ida iha Fomentu II, ami-nia fatin ho luan ektare hitu, sei dezenvolve área ne’e iha faze tolu, dahuluk sei investe millaun $12, daruak millaun $32, no ikus liu millaun $55. Projetu ne’e ho durasaun entre tinan 5 to’o 7. Projetu ne’e sei halo iha Fomentu II ho naran Discovery Business Industrial Zone Center, ne’ebé sei kria empregu rihun ida, no sei iha atividade seluk hosi projetu, ne’ebé sei fó mós serbisu ba timor-oan sira, ami-nia objetivu maka bele kontribui ba reseita Estadu,” Sakib Awan, hateten hafoin hasoru malu ho Xefe Governu, iha Palásiu Governu.
Notísia relevante : TradeInvest aprova proposta investimentu 20 ho totál kapitál biliaun $1,2
Primeiru-Ministru fó apoia tomak bainhira empreza hato’o lala’ok investimentu ne’e.
“Ami iha kompromisu atu investe iha Timor-Leste, bainhira ko’alia ho Primeiru-Ministru, nia espresa apoia tomak kona-ba atividade ne’ebé ami hakarak halo iha Timor-Leste, tanba ema ne’ebé serbisu iha empreza ne’e aleinde serbisu, kapasita mós timor-oan sira,” nia akresenta.
Aleinde ne’e, empreza estranjeiru ne’e kompromete kontribui ba planu dezenvolvimentu nasionál no planu Governu rasik.
“Área ne’ebé East Timor Trading sei investe iha Timor-Leste hodi kria empregu ba timor-oan sira maka hanesan área fatureira, fábrika prosesamentu, agrikultura, nomós atu kapasitasaun timor-oan sira,” Jerente empreza relata.
Empreza mós iha planu halo redusaun ba sasán importasaun liuhosi halo investimentu iha área oin-oin.
“Durante ne’e Timor-Leste importa produtu barak hosi rai-li’ur, ami kompromete katak produtu sira ne’ebé Timor importa ami sei prodús iha rai-laran, nune’e Timor-Leste labele depende de’it ba produtu importadu,” nia tenik.
East Timor Trading eziste iha Timor-Leste durante tinan 12 ona, ne’ebé loke ona Burger King, Gloria Jeans no loja ne’ebé fa’an tua, Otél Discovery Inn (taka). Daudaun empreza iha traballadór hamutuk 200.
Empreza ne’e kontribui ona taxa ba Timor-Leste, ne’ebé iha tinan 10 ezisténsia kontribui ona millaun $55 ba reseita Estadu.
“Ha’u iha mehi ida katak East Timor Trading atu fó empregu 1% hosi populasaun Timor, signifika emprega ema hamutuk rihun 13 iha Timor-Leste. Ne’ebé bainhira ha’u filafali ba Maromak no Maromak husu saida mak ha’u kontribui ba Timor-Leste, ha’u dehan ha’u kontribui redús dezempregu liuhosi kria postu traballu ba timor-oan sira,” Sakib Awan otimista
Jornalista : Antónia Gusmão
Editora : Julia Chatarina
