Empreza xineza iha interese investe iha área explorasaun mina no gás
DILI, 28 setembru 2023 (TATOLI)-–Primeiru-Ministru (PM), Kay Rala Xanana Gusmão, kinta ne’e, simu delegasaun hosi setór privadu Repúblika Populár Xina ne’ebé hamahan-an iha Federasaun Komérsiu Xina, ne’ebé iha empreza balun aprezenta interese investe iha Timor.
“Ami hosi CCCPI Branch for Gas Industry, mai iha Timor-Leste hasoru Primeiru-Ministru hodi ko’alia kona-ba kooperasaun iha explorasaun no dezenvolvimentu mina no gás, tantu iha tasi okos nomós rai maran, maibé prioridade liu ba rai maran. Durante enkontru ami mós ko’alia kona-ba explorasaun enerjia renovável hanesan enerjia solár, turbina eólika no sira seluk,” Xefe Delegasaun Zen Gguoyong, relata hafoin hasoru malu ho PM Xanana, iha Gabinete Fronteira Marrítima, iha Palásiu Governu.
Notísia relevante : Taxa produsaun mina no gás iha Bayu-undan hahú tun
Aleinde ne’e, empreza mós hakarak investe iha transportasaun, merkadu no komérsiu internasionál Timor-Leste ba Xina nomós nasaun seluk.
“Maibé foku prinsipál mak investe iha mina no enerjia renovével. Tanba ne’e, ami sei introdús mós empreza seluk hosi Xina ba Timor-Leste tanba ami hotu iha mahon Federasaun Komérsiu Xina nia okos,” nia akresenta.
Empreza sei halo diskusaun kle’an ho Ministériu Petróleu Rekursu no Minerál (MPRM) kona-ba bloku sira ne’ebé mak Governu promove no halo ona konkursu públiku. Maski nune’e, molok avansa ba oin presiza iha akordu ruma kona-ba investimentu ne’e.
Jornalista : Antónia Gusmão
Editora : Julia Chatarina
