Estudante 5000-resin iha Baucau sei tuir ezame nasionál
BAUCAU, 23 setembru 2023 (TATOLI) – Estudante hamutuk 5.851 komposta hosi ensinu sekundáriu, tékniku vokasionál no ensinu báziku iha Baucau sei tuir ezame nasionál iha fulan-outubru tinan-ne’e.
Diretór Serbisu Munisipál Edukasaun Baucau, Augosto Ornai Ximenes, esplika, preparasaun ba ezame hahú ona nune’e edukasuan Baucau submete ona dadus nasionál no sei hein enkontru nível munisípiu no ministériu ligadu ezame nasionál no lokál.
“Kuandu gabinete dezenvolvimentu kurrikulár ministériu nian fó ona númeru ezame, ita sei halo preparasaun tékniku nune’e bele ezame iha tempu besik,” Diretór Serbisu Edukasaun Munisipál Baucau hateten iha Vila Nova, kinta ne’e.
Tuir kalendáriu edukasaun, ezame nasionál sei realiza durante loron tolu,16 to’o 19 fulan-outubru no ezame lokál loron tolu, 20 to’o 23 fulan-outubru.
“Estudante sira sei kontinua prepara matéria ezame tanba hela semana-rua,” Augosto Ximenes akresenta.
Tuir dadus estudante ensimu sekundáriu hamutuk 2.390, komposta hosi mane na’in-1.037 no feto 1.353, ensinu tékniku vokasionál hamutuk na’in-236 komposta hosi mane 125 no feto 111.
Ensinu bázíku hamutuk estudante 3.225 komposta hosi mane 1.508 no feto 1.717 ho totáll sentru realizadora hamutuk 37 no ensinu sekundária hamutuk 21 no tékniku vokasionál hamutuk sentru realizadora haat.
Jornalista : Natalino Belo
Editór : Evaristo Soares Martins
