Governu aseita halo rekrutamentu ba ajente no ofisiál PNTL 500
DILI, 28 setembru 2023 (TATOLI) – Ministu Interiór, Francisco Guterres, dehan Governu konkorda ona atu halo rekrutamentu ba membru PNTL na’in-500 hodi responde ba nesesidade instituisaun.
Nia dehan, Ministru Interiór no Komandu Jerál halo ona diskusaun kona-ba kestaun rekrutamentu ba membru PNTL foun tinan oin, ho nune’e Komandu Jerál rekomenda ba ministériu katak Governu presiza halo rekrutamentu iha tinan oin. Tanba ne’e Governu aseita ida ne’e.
“Iha 2024 ita sei iha rekrutamentu rua, ida ba ajente no ida seluk ba rekrutamentu ita-nia kadetes ofisial sira, Ha’u koalia ona ho Komandante Jerál PNTL no Komandu rekomenda ona katak totál kadetes ba membru PTNTL ne’ebé ita atu rekruta ne’e mak hamutuk 500”, Francisco Guterres hateten ba jornalista sira hafoin partisipa workshop ba revizaun kuríkulu, ne’ebé hala’o iha Sentru Formasaun Polísia (CFP, sigla portugés), Comoro, kinta ne’e.
Governante ne’e hateten, razaun Governu halo rekrutamentu ba kadetes ofisiál sira tanba haree ba nesesidade instituisaun nian, tanba bazea ba iha rejime promosaun kareira, PNTL nia estatutu no lei orgánika PNTL nian, promosaun ba membru PNTL ida hosi postu ajente mai to’o Inspetór Xefe, normalmente ne’e tinan 30 no hosi inspetór ba Superintende Xefe normalmente ne’e presiza tinan ualu ka bele to’o tinan 15.
Nia esplika, agora daudaun membru PNTL barak mak iha asistente superintendente atu to’o kareira promosaun superintendente xefe presiza tempu, tanba ofisiál balun agora ne’e iha ona idade 40 ou 45 idade, molok promove ba superintendente xefe, nia pasa ona ba idade reforma, entaun instituisaun enfreta krize lideransa.
“Entaun ita iha krize lideransa iha institusaun PNTL nian liuliu ba membru PNTL ne’ebé ho deviza superintendente xefe, tanba ne’e iha tinan oin ita halo rekrutamentu rua ida ba ajente no ida ba ofisiál sira para ita rezolve krize lideransa ne’e rasik”, nia adianta.
Nia dehan, ida-ne’e presiza halo, sé lae tinan sira tuir mai ne’e, PNTL hahú faze bolu krize lideransa.
“Ha’u sei koalia ho Komandu atu haree liuliu ba kestaun konsisaun ba fatin oinsá atu akomoda membru foun sira-ne’e, atu ita tenke prepara ho di’ak hosi ajente to’o ofisiál, nune’e bainhira sira konklui formasaun iha akademia polísia tenke ho di’ak”, nia konklui.
Jornalista: Natalino Costa
Editór : Zezito Silva
