DILI, 28 setembru 2023 (TATOLI) – Governu hamutuk ho Empreza importadór sira konkorda malu ona no sei hatún folin foos iha merkadu iha teritóriu nasionál.
Folin foos ne’ebé sa’e makas sai preokupasaun boot ba sosiedade tomak, tanba ne’e liuhosi Konsellu Ministru, primeiru-ministru orienta ministru relevante sira atu servisu hodi rezolve asuntu ne’e ho lalais.
Vice Primeiru-Ministru, Ministru Koodernadór Asuntu Sosiál Mariano
Assanami Sabino, Vice Primeiru-Ministru Asuntu Ekonómiku ezersísiu, Miguel Manetelu no Ministru Komérsiu Indústria (MKI) Nino Pereira, ezekuta orientasaun Xefe Governu nian hodi konvoka enkontru ho kompaña importador sira hodi diskute kestaun ne’e.
Hafoin enkontru, Ministru Nino Pereira hatete, iha fulan hirak nia-laran, problema ne’ebé sai polémika liuliu folin foos ne’ebé sa’e, Governu halo ona medida no to’o ona iha konkluzaun ida ba normalizasaun presu foos iha Timor-Leste.
“Primeiru-Ministru hatún orientasaun prazu loron tolu, ba Ministériu MKI ho desizaun sira ne’ebé ita haree importante duni atu ita bele sai hosi situasaun ida-ne’e, tanba ne’e ohin ita enkontru ho Vise Primeiru-Ministru na’in-rua ho kompaña importadór ne’ebé iha kooperasaun di’ak hodi halo enkontru lubuk ida hodi garante katak presu ida-ne’e ita sei normaliza, garante mós katak estoke ne’ebé mak iha bele atende ba ita-nia nesesidade konsumu foos iha merkadu nivel nasionál”, Nino Pereira dehan ba jornalista sira iha, Palásiu Governu, foin lalais ne’e.
Tanba ne’e, Prezidente Repúblika iha tempu badak dekreta ona dekretu lei hodi fó subsídiu ba kompaña inportadór. Governu sei foti medida hodi asegura presu foos ba teritóriu tomak ho baze kada kilograma $0,50 no foos karon ida ho 25gk ho presu $12.
“Ami iha ona konkordánsia ho kompaña importadór sira hatudu komitmentu boot tebes hodi ita bele delibera to’o detallu sira, ne’ebé aplikasaun ne’e ita sei hahú ho medida balun ne’ebé ita sei la’o hanesan kontratu ne’ebé ita sei prepara hodi asegura medida intervensaun hodi estabiliza presu foos iha ita-nia nasaun”, ministru ne’e subliña.
Konkordánsia ne’ebé iha mak Governu sei fó subsídiu $500 kada foos karon 25kg no sei buka dalan mós apoiu CLN nian oinsa fasilita tula foos sira ba munisípiu.
Tanba ne’e, ministériu sei orienta funsionáriu MCI iha munisípiu atu rekolla dadus kompaña sira ne’ebé baibain faan foos. Iha loron ida rua tan bele implemeta ona subsídiu hein to’o presu foos la’o normál fila fali.
Jornalista: Hortencio Sanchez
Editór : Zezito Silva
