Dili, 28 Setembru 2023 (TATOLI) – Diretór Nasionál Ministériu Agrikultura Pekuária Peska no Floresta (MAPPF) Lucio M. Ribeiro, hateten ministériu sei distribui fini batar tonelada 79 ho tipu Sele no Noi Mutin ba agrikultór sira iha novembru ba munisípiu hotu.
“Ami aloka orsamentu $327.000 atu sosa fini batar tonelada 79 hosi tos-na’in sira iha teritóriu nasionál no sei distribui fali ba sira iha teritóriu nasionál, batar ne’ebé ita atu hola mak batar ho tipu Sele no Noi Mutin, mak sei fó gratuita ba sira, nune’e bele kuda fali”, Lucio Ribeiro dehan ba Agência TATOLI iha edifísiu MAPPF Comoro, ohin.
Governu nia objetivu atu fahe batar fini ba tos-na’in sira oinsa atu promove nafatin produtu rai laran.
Prosesu sosa batar fini ne’e, ministériu sei loke konkursu ba kompaña lokál bainhira manán mak iha direitu ba sosa fini hodi fahe ba tos-na’in sira.
“Prosesu sosa batar Sele no Noi Mutin bainhira prosesu ba kompaña la’o los ona no sei distribui ba tos-na’in sira iha munisípiu iha novembru tinan ne’e”, nia esplika.
Polítika distribuisaun fini ne’e halo atu hadi’ak produtividade batar ba konsumidór nasionál no mós hakarak utiliza nu’udar alternativa ai-han animál iha Timor-Leste.
Batar fini ne’ebé sei sosa ho tonelada 79 atu distribui ba munisípiu sira hanesan, Ainaro hamutuk 6.000 kg, Aileu 5.000 kg, Baucau 7.000 kg, Covalima 7.000 kg, Ermera 5.000 kg, Liquiça 6.000 kg, Lautem 7.000 kg, Manatuto 6.000 kg, Manufahi 7.000 kg, Viqueque 7.000 kg, Atauro 3.000 kg no rezerva iha nasionál hamutuk 1.000 kg.
Governu garante ho servisu ne’ebé iha sei hasae produtividade no garante seguransa ai-han iha Timor-Leste.
Jornalista: Hortencio Sanchez
Editór : Zezito Silva
