iklan

HEADLINE, SAÚDE

MS fó pose ba kargu xefia iha servisu sentrál

MS fó pose ba kargu xefia iha servisu sentrál

Vise-Ministru Fortalesimentu Institusionál Saúde, José dos Reis Magno, fó pose ba kargu xefia foun iha Ministériu Saúde (MS), iha salaun MS Caicoli, kuarta (27/09). Imajen Tatoli/Francisco Sony

DILI, 27 setembru 2023 (TATOLI)- Ministériu Saúde fó tomada pose ba kargu diresaun no xefia iha servisu sentrál, servisu nasionál ambulánsia emerjénsia medikamentu, diretór ezekutivu iha Hospitál Nasionál Guido Valadares (HNGV) no institutu nasionál farmasia no produtu  mediakmentu (INFPM).

“Ohin ita fó tomada pose ba kargu foun sira hanesan diretór jerál kuidadu saúde primariu, diretór unidade aprovizionamentu sentrál, diretór ezekutivu institutu nasionál farmasia no produtu médiku (INFPM), diretora ezekutiva HNGV no xefe departamentu kontratasaun publika SNAEM”, Vise Ministru Fortalesimentu Instituisionál Saúde José dos Reis Magno, hateten iha nia diskursu hafoin serimónia tomada pose iha Ministériu Saúde Caicoli, ohin.

Nia dehan, diresaun jerál ba kuidadu saúde primariu hanesan servisu sentrál ministériu saúde nian ne’ebé responsavel atu ezekuta polítika no asegura apoiu tékniku administrativu ba membru Governu, responsavel ba área saúde, ba orgaun servisu administrasaun direta Estadu ba kompeténsia MS nian. Ezekusaun polítika no koordenasaun servisu ba prestasaun kuidadu saúde primáriu ne’ebé konkreta edukasaun no promosaun saúde nutrisaun prevensaun no kontrolu ba moras sira inklui mós saúde ambientál.

“Unidade aprovizionamentu sentrál mak servisu sentrál MS ne’ebé responde atu realiza servisu sira ne’ebé relasiona ho apoiu tékniku no administrativu ba orgaun servisu husi departamentu Governu nian”, nia esplika.

Nia haktuir, Instituto Nasionál Farmasia no Produtu Médiku (INFPM) hanesan instituisaun públika MS nian ne’ebé ho ninian autonomia administrativa finanseira no patrimóniu rasik atu asegura efisiénsia iha aprovizionamentu lojístiku no fornesimentu ba produtu farmaseútiku no ekipamentu médiku ba servisu nasionál instituisaun ida-ne’e, ezerse ninia atividade ba superintidénsia MS.

“Hospitál Nasionál Guido Valadares hanesan ospitál nasionál referénsia ba  teritóriu nasionál no jerál sai hanesan prestasaun kuidadu saúde tersiáriu ba oras hotu ne’ebé hatutan husi ospitál rejionál iha TL. Ospitál iha nia funsaun atu hala’o nia planu finansia no prestasaun kuidadu saúde sira iha ospitál laran. Atu estabelese servisu kuidadu espesializadu sira kondisiona ho númeru no kualidade profisionál ba saúde no tékniku espesializadu ho reforsa kondisaun no disponibilidade iha ospitál ne’ebé sai hanesan sentru estajiu ho kualidade ne’ebé di’ak liubá profisionál saúde hotu, hamenus transferénsia pasiente sira ba nasaun estranjeiru”, nia revela.

Nia relata, departamentu kontrasaun públika ne’ebé tutela iha diresaun jerál SNAEM ho objetivu atu fasilita no mellora atividade kontratasaun públika.

Vise Ministru Saúde husu ba emposadu sira katak nafatin ezerse funsaun sira ho di’ak no responsabilidade profisionál, onestu no lealdade aas atu apoiu MS hodi atinje alvu sira.

Emposadu Brigido Simão Dias de Deus mak asume kargu hanesan Diretór Ezekutivu Instituto Nasionál Farmasia no Produtu Médiku, hateten kna’ar ida-ne’e privilejiu maibé ida-ne’e hanesn mós dezafiu liuliu farmasia iha Timor, buat barak mak akontese hanesan estoke aimoruk ne’ebé daudaun mamuk, aimoruk espire, buat sira-ne’e hanesan kna’ar ida ne’ebé rezolve iha tempu badak.

“Ita haree daudaun, aimoruk estoke mamuk iha fasilidade saúde sira, entaun ho kna’ar foun ida ne’e ami sei rezolve iha tempu badak’’, Brigido Simão Dias de Deus promete.

Empozada Cecilia Barros Mendonça asume kargu hanesan Diretora Ezekuitva HNGV, dehan servisu atendimentu iha HNGV ne’ebé durante seidauk másimu, hanesan diretora sei kontinua mellora.

“Ha’u mai atu kontinua servisu diretór sesante nian, nia halo ona buat  balun no saida mak durante seidauk la’o presiza atu kontinua hadia ida ne’e. No ha’u-nia misaun no vizaun ba oin mak bainhira ha’u ba asume kna’ar ida-ne’e sei hadia kualidade HNGV no halo rekapasitasaun ba rekursu umanu sira atu bele fó atendimentu ida ne’ebé di’ak ba ita-nia pasiente sira”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!