RAEOA selebra akordu ho empreza Moryoung Ltd atu investe iha setór turizmu no agrikultura
OÉ-CUSSE, 28 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e selebra akordu ho empreza Maryoung Internasionál Ltd atu investe iha setór turizmu no agrikultura iha Oé-Cusse Ambeno.
“Ohin ita asina akordu ho kompañia internasionál ne’e, ita halo diskusaun kleur ona, sira iha interese iha área turizmu, agrikultura no mós iha setór seluk, ne’ebé ita bele deskuti ho sira, entaun depois diskusaun naruk, ita asina akordu ida atu define jerál saida mak sira-bele mai atu halo,” Arsénio Bano ba jornalista sira iha Gabinete ZEESM Oé-Cusse.
Tuir nia, iha RAEOA iha turizmu bele ba iha otelaria, agrikultura liuliu ba agrobisnis ninian, bele mós ba setór edukasaun, entaun ita komenta ho prinsípiu, depois haree kada proposta sira, saida mak atu halo iha RAEOA.
“Tanba sira mai iha-ne’e kuaze fulan ida ona, haree ona fatin barak, tan ne’e maka ita hamutuk ho sira akompaña hosi Sekretáriu Rejionál Terra Propriedade atu observa fatin, karik iha interese, depois ita sei estuda sira-nia proposta téknika nian,” nia informa.
Nia hatutan, bainhira proposta ne’e tama iha Autoridade mak foin kontinua halo paresér, tanba interese ba RAEOA liuhosi akordu, bele kria kampu traballu, kontribui reseita ba RAEOA, no dada ema seluk bele mai vizita Oé-Cusse, tanba bainhira mai sei gasta osan ba Oé-Cusse.
Nune’e mós bele funsiona aeroportu sira, sei presiza ona aviaun, otél traballadór no hahán mós aumenta.
“Ita ohin asina ona, sira atu mai bainhira no atu saida, ita sei diskute detalla iha faze tuir mai, tanba ita-nia interese ne’e atu la’o duni, depois bele hatama reseita ba kofre Estadu,” nia katak.
Jornalista: Abílio Elo Nini
Editór: Evaristo Soares Martins
