The Asia Foundation fasilita “refresher training” ba OPS iha Covalima
COVALIMA, 28 setembru 2023 (TATOLI)–Organizasaun The Asia Foundation servisu hamutuk ho Polísia Nasionál Timor-Leste (PNTL) fasilita refresher training ba Ofisiál Polísia Suku (OPS) hosi suku 30 iha Covalima.
“Formasaun ida-ne’e hanesan refresher training, tanba servisu kleur iha suku nune’e Ita hakarak hetan informasaun hosi OPS kona-ba sira-nia servisu ne’ebé sira hala’o iha suku,” Xefe Departamentu Polísia Komunitária hanesan mós Portavós PNTL, Superintendente Polísia António da Luz, hateten ba jornalista sira iha salaun Canosa, kinta ne’e.
Formasaun ba OPS ne’e tanba sira hala’o servisu kle’ur ona iha suku liuhosi formasaun ida-ne’e atu hasa’e sira-nia koñesimentu presiza fó hanoin nafatin, nune’e atu servisu ho responsabilidade.
The Asia Foundation hanesan parseiru hosi Polísia Nasionál Tilomor-Leste (PNTL) liuhosi Departamentu Polísia Komunitária hodi fasilita formasaun parte ida atu hasa’e OPS sira-nia koñesimentu kona-ba serbisu polísia.
Membru PNTL tenke hatene funsaun hanesan Polísia Komunitária, investigasaun, servisu informasaun, servisu tranzítu no patrollamentu tenke hatene no mós oinsá atu ezekuta iha terrenu halo atendimentu asidente, insidente, deskobre informasaun iha baze sira ida-ne’e papél importante.
Formasaun ne’e hala’o durante loron rua hanesan hahú loron kinta (28 setembru 2023) ne’ebé OPS fahe sira-nia esperiénsia servisu hanesan Ofisiál Polísia Suku (OPS) sei finaliza iha loron sesta (29 setembru 2023).
Komandante PNTL Munisípiu Covalima, Superintendente Calisto Gonzaga, hateten formasaun ba Ofisiál Polísia Suku hanesan formasaun refresher training atu konta sira-nia servisu durante iha suku.
“Formasaun ida-ne’e ita bolu formasaun refresher training atu fó hanoin no konta fali ita OPS sira-nia istória durante iha suku tanba kada suku ho sira-nia istória ne’ebé diferensa ho suku seluk depende ba ámbitu sosiedade,” nia dehan.
OPS konta sira-nia istória ba nasionál hafoin hosi nasionál fó informasaun atu nune’e OPS relembra fali papél balun atu reforsa sira-nia servisu liga ho polísia komunitária.
“Ita tama ona fulan-outubru, ita hala’o eleisaun xefe suku. Ho formasaun ida-ne’e, atu reforsa OPS sira-nia koñesimentu haforsa informasaun ba iha nivél suku,” nia hateten.
Formasaun ne’e partisipa hosi OPS na’in-30 ne’ebé mai hoi suku 30, tanba formasaun hodi hetan informasaun hosi nasionál, liga ba papél atu halo prevensaun krime nune’e bele redús konflitu.
Jornalista : Celestina Teles
Editór : Cancio Ximenes
