Xanana no investidór Malázia diskute posibilidade investimentu
DILI, 28 setembru 2023 (TATOLI)-–Primeiru-Ministru (PM), Kay Rala Xanana Gusmão, kinta ne’e, simu investidór iha área oioin hosi Malázia hodi partilla informasaun ba malu no kooperasaun iha tempu tuir mai.
“Delegasaun sira ne’e iha área oin-oin, sira mai hodi fó koñese-an ba ita, sira sei mai fali hodi hasoru membru Governu sira ne’ebé trata asuntu sira ne’ebé liga ho área ne’ebé iha, sira mós hakarak partisipa iha dezenvolvimentu Timor nian,” Xanana hateten hafoin simu delegasaun, iha Gabinete Fronteira Marítima, Palásiu Governu.
Iha biban hanesan, Xefe delegasaun, Chua Tian Chan, hateten, relasaun bilaterál entre país rua durante ne’e di’ak tebes.
“Ami apresia tebes ho kooperasaun país rua, iha hasoru malu ne’e ami halo ona diskusaun ho Primeiru-Ministru oinsá dezenvolve ekonomia Timor nian, ne’ebé planeia ona oinsá halo planu di’ak hodi serbisu hamutuk ba dezenvolvimentu ekonomia Timor-leste, espera bele realiza planu sira ne’e,” nia akresenta.
Notísia relevante : Investór Malazia hakarak investe iha TL
Primeiru-Ministru fó hanoin katak iha fulan-rua mai Governu prepara ona planu sira, nune’e iha tinan oin bele ona simu investidór sira ne’ebé hakarak investe iha área oioin iha Timor.
“Ami sei halo investimentu ne’ebé foku liu ba setór agrikultura tanba ita haree nesesidade rai-laran dependénsia ba produtu importasaun. Tanba ne’e, Malázia hakarak apoia, nune’e mós iha área saúde oinsá harii fasilidade saúde di’ak nune’e hamenus tratamentu saúde iha rai-li’ur,” nia tenik.
Ligadu ho investimentu iha área saúde, Malázia hakarak fó oportunidade ba médiku timor-oan sira hodi estuda iha nível espesialista iha área oin-oin.
Jornalista : Antónia Gusmão
Editora : Julia Chatarina
