DILI, 28 setembru 2023 (TATOLI) – Prezidente Repúblika José Ramos Horta realiza reuniaun ho membru Governu hamutuk 16 hodi koa’alia kona-ba preparasaun ba festivál nasionál ne’ebé sei hala’o iha tinan oin.
“Prezidente Repúblika realiza reuniaun ho membru Governu lubuk ida hodi ko’alia kona-ba preparasaun ba festivál nasionál ne’ebé ita hanoin atu realiza iha tinan oin, ita sei hala’o iha agostu to’o setembru durante fulan ida”, Assesor tékniku Prezidénsia Repúblika Agustinho Caet ba jornalista sira iha Palásiu Prezidensiál, kinta ne’e.
Festivál nasionál ne’e inisia hosi Prezidente Repúblika hodi hala’o atividade lubuk ida hanesan, kulturál, desportiva ho objetivu atu hametin unidade no estabilidade nasionál atu bele promove área turístika iha Timor-Leste.
“Ida-ne’e mak Prezidente Repúblika hanoin atu kolabora di’ak ho membru Governu sira atu kontribui másimu ba atividade ne’ebé ita atu realiza, entaun ko’alia ona ho ministériu sira atu prepara orsamentu atu bele hatama mós iha Orsamentu Jerál Estadu (OJE) tinan 2024 nian atu bele realiza atividade ne’e ho suses”, nia informa.
Tuir planu, eventu ne’e, balun hala’o iha Dili no balun hala’o iha munisípiu.
Kona-ba desportiva nian sei realiza kompetisaun hanesan, Taekwondo, Silat, kurida Maratona, kurida bisikleta maibé tenke utiliza ho kamera atu bele hasai filmajen no fotografia hodi partisipa hanesan konkursu bainhira siklista ida aprejenta filmajen no fotografia ne’ebé di’ak bele hetan premiu.
Nune’e mós sei realiza seminariu ho organizasaun relijioza sira no sei konvida relijiaun sira hosi nasaun seluk hanesan Indonézia, Malazia, Singapura no seluk tan atu mai ko’alia kona-ba saida mak papél atu hametin fraternidade umanu.
Parte kulturál nian sei envolve mós ema Aborijen sira hosi Austrália, Papua Indonézia, Mauri sira iha Nova Zelandia no seluk tan atu mai Timor-Leste hodi hatudu sira-nia tradisaun ba povu Timor-Leste atu nasaun viziñu sira bele komprende ba malu kada kultura ne’ebé iha.
Orsamentu ba atividade ne’e seidauk hatene nia montante maibé hosi Gabinete Prezidénsia Repúblika sei preve millaun $2, maibé ministériu sira seidauk hatene kada ministériu ida tau hira tanba sei hein desizaun iha OJE 2024.
Ministériu hirak ne’ebé envolve iha atividade ne’e mak Ministériu Obras Públiku (MOP), Ministériu Edukasaun (ME), Ministériu Finansas (MF), Ministériu Transporte Telekomunikasaun (MTK), Ministériu Estatál (MAE), Ministériu Juventude Desportu Arte no Kultura (MJDAK), Ministériu Interior (MI) Ministériu Saúde (MS), Sekretariu Estadu Komunikasaun Sosiál (SEKOMS), Sekretaria Estadu Protesaun Sivíl (SEP), Sekretaria Estadu Bee no Saneamentu (SEBS), Sekretaria Estadu Eletrisidade (SEE) no seluk tan.
Iha atividade ne’e, Prezidente Repúblika orienta ona SEKOMS atu konvida mós media internasionál sira hosi nasaun oioin mai halo kobertura atu foka atividade hirak ne’e ba mundu.
Jornalista: Hortencio Sanchez
Editór : Zezito Silva
