Xefe Governu atualiza preparasaun OJE 2024 ba Horta
DILI, 28 setembru 2023 (TATOLI) – Primeiru-Ministru Kay Rala Xanana Gusmão, atualiza ba Prezidente Repúblika José Ramos-Horta, kona-ba preparasaun Governu nian ba Orsamentu Jerál Estadu (OJE) 2024.
“Ha’u informa ba Prezidente Repúblika kona-ba preparativu planu asaun hodi hakat ba diskusaun Orsamentu Jerál Estadu 2024 nian”, PM Xanana dehan hafoin reuniaun ho Horta iha Palásiu Prezidensiál, kinta ne’e.
Nia dehan, totál OJE 2024 seidauk hatene tanba daudaun ne’e ministériu hotu foin prepara planu asaun anuál.
Aleinde ne’e, informa mós kona-ba problema bee-moos iha kapitál Dili ne’ebé sai preokupasaun públika.
“Informa mós ba Prezidente kona-ba problema bee-moos ne’ebé horseik ami haree ona liuliu iha Becora no Becusse, ha’u rasik to’o iha ne’ebá haree liu loron tolu komunidade balu ba tesi tia kanu ne’ebé sira dada, entaun ha’u orienta ona Ministru Obras Públiku ho ekipa atu kontrola didi’ak kona-ba akontesimentu sira ne’e, atu bele rezolve bee-moos iha fatin sira ne’ebé falta bee-moos”, nia dehan.
Jornalista: Hortencio Sanchez
Editór : Zezito Silva
