Dadur sira iha prizaun Suai prodús batako kada loron 200-resin
COVALIMA, 30 setembru 2023 (TATOLI)—Dadur sira iha prizaun Suai liuliu iha sira-ne’ebé dadur iha bloku C hamutuk na’in-38 ne’ebé fahe grupu rua ne’e, kada loron prodús batako 200-resin.
Diretór Estabelesementu Prizaun Suai, Julio Dias Ximenes, hateten dadur sira iha estabelesimentu prizasaun Suai iha bloku C ne’e kada grupu uza mákina usa simente saka lima kada loron prodús batako 200-resin ne’ebé sira kahor masa uza de’it mákina ho naran model.
Prosesu dadur sira prodús batako iha prizaun Suai ne’e uza osan rezultadu hosi dadur sira ne’ebé kuda modo no prizaun faan ne’e m ak hodi rai osan hamutuk, hafoin uza fali osan refere hodi sosa rai-henek no simente hafoin faan fali batako ne’ e.
“Ita-nia prezu-sira iha prizasaun Suai la’ós la halo serbisu, sira halo servisu hanesan Bloku C sira hala’o servisu uza mákina hodi prodús batako,” Diretór Estabelesimentu Prizaun Suai, Julio Dias Ximenes, hateten ba Agência Tatoli, iha prizaun Suai, sesta ne’e.
Bazeia ba baze legál no lei ezekusaun penál artigu 59 bainhira prezu sira sai hala’o servisu durante loron 16, bele hetan indimizasaun pena (pemotongan masa tahanan) nune’e diretór mós husu ona paresér júridiku hein de’it despaixu.
Durante prezu sira hala’o servisu hetan kontrolu hosi Guarda prizonál hosi sesaun seguransa operasionál no sesaun tratamentu prizionál kuidadu saúde mak hala’o kontrolu ba prezu sira.
Ho nune’e, nia dehan, ema barak ko’alia katak prezu sira iha prizaun la halo servisu maibé la’e, prezu sira iha prizaun hala’o servisu.
Mákina ne’ebé prezu sira uza hodi prodús batako hetan apoiu hosi Governu Japaun liuhosi UNODS iha tinan 2020 ba estabelesimentu prizaun Becora, Gleno no Suai.
Hafoin hetan apoiu, Diretór estabelesementu prizaun Suai ho inisiativa tula mákina hosi Díli mai iha prizaun Suai, nune’e oras ne’e daudaun funsiona hodi prodús batako.
Prezu sira uza mákina prodús batako ho kualidade hahú iha fulan-jullu to’o ona fulan-setembru tiann 2023, no prizaun faan kada batako ida ho nia folin sentau 0,40 maibé tenke tula rasik tanba prizaun sira laiha transporte atu lori ba uma.
Tuir dadus, prezu iha prizaun Suai hamutuk 104 ne’ebé hosi Bloku A na’in-24, Bloku B na’in-29 no Bloku C na’in-38 ho sira-ne’ebé toma konta iha dapur hamutuk 13.
Prezu na’in-104 tuir área júridiku mai hosi munisípiu sira hanesan Covalima na’in-32, Ainaro na’in-23, Bobonaro na’in-34, Manufahi na’in-14 no Liquiça iha na’un-ida (1).
Jornalista : Celestina Teles
Editór : Cancio Ximenes
