DILI, 29 setembru 2023 (TATOLI) – Eskola Bázika Filiál (EBF) Mau-Surulou iha munisípiu Ermera ne’ebé anin sobu iha loron 06 setembru 2023 hetan ona apoia emerjénsia husi Ministériu Edukasaun.
Diretór Servisu Edukasaun Munisípiu Ermera, Eduardo Martins, realsa katak materiál emerjénsia ne’ebé ministériu fó iha loron 27 setembru liubá ne’e kompostu husi kalén, ai no pregu.
“Ita simu ona apoiu materiál emerjénsia husi Ministériu Edukasaun. Agora, parte eskola ho inan-aman sira organiza malu hela atu konstrui fali”, dirijente dehan ba Tatoli via telefone, ohin.
Eduardo Martins salienta katak maske eskola ne’e nia kondisaun grave totál, maibé la implika ba prosesu aprendizajen alunu nian tanba labarik sira kontinua uza sala provizória rua ne’ebé antes ne’e komunidade sira konstrui ona hodi kontinua sira-nian aula.
EBF Paralelo Mau-Surulou iha edifísiu ida ho sala aula tolu ne’ebé fahe ba turma rua dadeer no loraik. Eskola ne’e konstrui iha 2015 no akumula estudante hamutuk 115, profesór na’in-neen – permanente ida no kontratadu rua no voluntáriu tolu.
Jornalista: Tomé Amado
Editora: Maria Auxiliadora
