VIQUEQUE, 29 setembru 2023 (TATOLI)—Reprezentante Administradór postu Viqueque Vila, Juvinal Mascarenas, husu ba kandidatu líder suku atu esforsu no hakbesik ba eleitór, nune’e bele konvense eleitór hodi hili kandidatu preferénsia iha eleisaun suku iha fulan oin mai.
“Ha’u husu ba kandidatu sira tenke esforsu-an no hakbesik-an ba eleitór sira iha suku hodi hetan konfiansa iha loron 28 outubru 2023. Ha’u husu ba kandidatu sira tenke akompaña edukasaun sívika hosi Komisaun Nasionál Eleisaun (CNE, sigla portugés) hodi bele kompreende regra eleisaun suku,” Juvinal Mascarenas, hateten iha abertura edukasaun sivíka ne’ebé realiza hosi CNE, sesta ne’e.
Notísia relevante : CNE fó edukasaun sívika ba eleitór-sira iha Viqueque
Nia haktuir, ekipa hosi Ministériu Administrasaun Estatál (MAE) antes ne’e fó ona formasaun ba kandidatu xefe suku no xefe aldeia sira no husu atu serbisu maka’as hodi hetan konfiansa hosi abitante sira iha suku tanba alvu maka eleitór sira.
Aleinde ne’e, lei orgánika MAE hetan ona aprovasaun hodi koloka funsionáriu na’in-tolu ba kada suku, kompostu hosi ofisiál finansa, planeamentu no administrasaun suku hodi apoia suku ne’ebé sei implementa iha tinan 2024.
Administrasaun postu Viqueque Vila distribui ona lista kandidatura ba suku sira hodi prienxe kandidatu no apoiante sira.
“Ba sidadaun ne’ebé hanesan funsionáriu no ema baibain iha direitu atu kandidata-an ba xefe suku no xefe aldeia, bainhira liu maka rezigna-an hosi funsionáriu,” nia akresenta.
Iha fatin hanesan, Komisáriu CNE destakadu munisípiu Viqueque, Olávio da Costa Monteiro, hateten, prezensa ekipa iha suku hodi disamina lala’ok eleisaun suku bazeia ba lei númeru 09/2016 hodi fó koñesimentu ba eleitór kona-ba prosesu eleisaun suku.
“Tanba antes ne’e lei foun ita seidauk halo sosializasaun di’ak ba eleisaun suku nian. Tanba ne’e, agora ita esforsu disamina lei ne’e atu eleitór sira bele kompreende hodi lori eleisaun ne’e bele la’o ho susesu.
Nune’e mós, Xefe suku Maluru, Francisco Amaral, hateten, eleisaun suku ba tinan ida-ne’e feto hosi suku Maluru seidauk prontu kompete ba eleisaun suku.
“Iha suku Maluru ha’u konvoka ona feto sira hodi kompete iha eleisaun ba xefe suku no xefe aldeia, maibé feto seidauk prontu atu kandidata-an ba períodu ida-ne’e,” nia relata.
Nune’e, atividade edukasaun sívika ne’e hodi kria kondisaun ba asembleia meza no simu lista kandidatu suku. Forma asembleia suku kompostu hosi xefe aldeia ida, lia-na’in ida no delegadu ida.
Atividade edukasaun sívika oferese hosi CNE Viqueque, ne’ebé akompaña hosi Komisáriu destakadu no hetan partisipasaun hosi Komandante Eskuadra Polísia Nasionál Timor-Leste (PNTL) postu Viqueque Vila no eleitór hosi suku tolu Fatudere, Uma-Uain Leten no Maluru ho totál partisipante hamutuk na’in-120 resin.
Tuir dadus, eleitór hosi suku tolu kompostu hosi Fatudere 328, Maluru 639, Uma-Uain Leten 1.612.
Jornalista : Vitorino Lopes da Costa
Editora : Julia Chatarina
