DILI, 29 setembru 2023 (TATOLI) – Boxista Lendáriu, Manny Pacquiao, iha planu atu promove Boxista timoroan sira. Deklarasaun ne’e fó sai hafoin hasoru malu ho Prezidente Repúblika, Jose Ramos Horta, iha Palásiu Prezidensiál, ohin.
“Ha’u kontente tebes tanba ha’u bele mai iha ne’e, ha’u sei halo planu atu promove Boxe Timor-Leste, ohin loron ha’u sei vizita klube Boxe sira, iha ne’ebá ha’u sei ko’alia ho sira no fo motivasaun di’ak ba sira atu promove liután Boxista timoroan sira-nia mentalidade no kapasidade”, Manny Pacquiao revela.
Iha okaziaun ne’e Boxista Manny Pacquiao hateten, vizita ne’e hanesan vizita dahuluk no agradese tebes ba lider no povu Timor-Leste ne’ebé simu nia ho di’ak.
“Ne’e ha’u-nia vizita primeiru mai Timor-Leste, ha’u agradese ba lider no ema hotu iha ne’e simu ha’u ho di’ak”, Pacquiao revela.
Prezidente Repúblika José Ramos Horta konsidera vizita Boxista Lendáriu Manny Pacquiao mai Timor-Leste importante tebes atu motiva Boxista timoroan sira.
“Pacquiao ema koñesidu ida iha mundu, nia vizita ne’e importante, primeiru atu anima desportu Boxe iha nasaun ne’e tanba joven barak gosta Boxe, segundu promove desportu jerál ikus liu hametin relasaun ema ho ema entre Filipina ho Timor-Leste”, Horta afirma.
Xefe Estadu subliña, vizita ne’e hanesan símbolu importante ida tanba Filipina ho Timor-Leste hanesan nasaun Katóliku iha Ázia.
Tuir planu, Prezidente Repúblika sei vizita Filipina iha novembru mai ne’e hodi ko’alia kona-ba kooperasaun bilaterál ho Filipina.
Durante vizita Prezidente Horta sei konvida Paquiao dala ida tan atu vizita Timor-Leste iha 28 novembru.
Jornalista: Hortencio Sanchez
Editór : Zezito Silva
