PR Horta reune ho MEIP Británika

DILI, 29 setembru 2023 (TATOLI) – Ministra de Estado para o Indo-Pacífico do Reino Unido (MEIP) Anne-Marie Trevelyan hasoru malu ho Prezidente Repúblika José Ramos Horta hodi ko’alia kona-ba hametin kooperasaun bilaterál ho Timor-Leste.

“Hasoru malu ho Prezidente Horta ko’alia kona-ba oinsa Governu Británika atu servisu hamutuk ho Governu Timor-Leste hodi hametin liután dezenvolvimentu ekonómiku iha Timor-Leste”, Ministra Anne-Marie dehan ba jornalista-sira iha Palásiu Prezidensiál, sesta ne’e.

Nune’e mós, Governu británika hakarak halo kooperasaun ho Timor-Leste hodi haree ba dezenvolvimentu saúde no nutrisaun.

“Durante ha’u-nia vizita iha ne’e sei halo mós lansamentu ida ba programa Reinu Unidu nian ida kona-ba saúde, servisu hamutuk ho UNICEF atu apoiu kampaña nasionál hodi kombate ma-nutrisaun ba labarik sira, ida-ne’e Prezidente Horta nia programa maibé servisu hamutuk ho UNICEF”, nia hatete.

Iha parte seluk, parte rua diskute mós kona-ba Governu Británika nia apoiu ba Timor-Leste hodi adere ba membru ASEAN atu bele dezenvolve Timor-Leste nia ligasaun komérsiu ho nasaun importante sira iha Àzia hodi bele fó oportunidade servisu ba timoroan sira.

Jornalista: Hortencio Sanchez

Editór : Zezito Silva