DILI, 30 setembru 2023 (TATOLI)—Reprezentante hosi ASEAN Parliamentarians for Humans Rigths (APHR), Yb Gooi Hsiao Leung, hamutuk ho delegasaun hasoru malu ho Prezidente Repúblika (PR), José Ramos Horta, hodi ko’alia kona-ba junta militár ne’ebé akontese iha Myanmar no kestaun seluk tan.
“Ami hakarak haree asaun forte ba solusaun problema ne’ebé akontese iha Myanmar. Ami konsidera katak Prezidente iha objetivu klaru no ideia klaru kona-ba saida mak nia hakarak haree,” Reprezentante APHR ne’e hateten hafoin ramata enkontru ho Xefe Estadu iha Palásiu Prezidensiál, Bairru Pité, sábadu ne’e.
Notísia relevante : Horta ho Prokuradór ICC diskute asuntu Myanmar
Nune’e, ASEAN iha inisiativa halo advokasia maka’as atu tau-matan liután ba asaun sira ne’ebé sei halo iha Myanmar.
“Timor-Leste mós iha kompromisu forte haree ba progresu problema Myanmar, tanba ne’e sei iha preokupasaun liu tan hosi membru ASEAN,” nia akresenta.
Biban ne’e, delegasaun APHR agradese tanba bele hasoru malu ho PR Horta hodi ko’alia kona-ba progresu dezenvolvimentu ba liberdade internet iha Timor-Leste.
“Ami hamutuk ho delegasaun hosi parlamentu ASEAN no grupu Direitu Umanu reprezenta hosi nasaun ualu iha ASEAN, ohin ami vizita Prezidente Repúblika, ami agradese tebes ba tempu, iha enkontru ne’ebé ami hato’o vizita serbisu mai Timor-Leste to’o loron 03 outubru, hasoru malu ho entidade relevante no ami iha interese liuhosi progresu dezenvolvimentu ba liberdade internet iha Timor-Leste,” nia dehan.
Nune’e, iha sorumutuk ho Xefe Estadu, delegasaun partilla dezenvolvimentu saida mak akontese iha Timor-Leste inklui kompromisu di’ak iha direitu umanu nomós direitu feto sira.
Aleinde ne’e, partila, habelar no asesu ba internet iha Timor-Leste, ne’ebé daudaun iha projetu kabu submarinu no hakarak apreende liu kona-ba oinsá Timor-Leste bele halo manutensaun ba internet. Bele promove internet nu’udar instrumentu ba ema hotu nia fortalesimentu no bele uza hodi hetan benefísiu.
Jornalista : Nelson de Sousa
Editora : Julia Chatarina
