VIQUEQUE, 01 outubru 2023 (TATOLI)—Joven feto ida ho inisiál DGP, idade 17, tara-an iha odomatan ninia kuartu oin, iha área Betu-hun, aldeia Mane-haat, suku Caraubalu, postu administrativu Viqueque Vila, munisípiu Viqueque, iha domingu (01/09), maizumenus tuku 10:00.
Komandante investigasaun Polísia Nasionál Timor-Leste (PNTL) Viqueque, Paulino Freitas Soares, haktuir, hafoin família matebian informa ba parte Polísia, ekipa investigasaun hamutuk ho ekipa médiku hosi Internamentu bá fatin akontesimentu hodi halo identifikasaun.
“Ohin, ami tun ho ekipa mediku sira mai halo identifikasaun ba matebian, maibé ami la identifika sinál ofensa ruma hasoru vítima. Tuir prosesu investigasaun tenke lori ba autópsia, nune’e ami halo koordenasaun ho família vítima sira, maibé família sira rejeita halo prosesu autópsia,” Komandante investigasaun, hateten iha fatin akontesimentu, área Betu-hun, Caraubalu, domingu ne’e.
Notísia relevante : Polísia seidauk fó-sai rezultadu investigasaun kazu Filomena tara-an
Tuir Paulino Freitas, joven ne’e tara-an iha odamata kuarta ho tali naruk metru rua resi, ne’ebé hafoin ekipa Polísia halo hotu investigasaun, entrega mate-isin ba família hodi hala’o prosesu fúnebre tuir tradisaun Timor nian.
Iha fatin hanesan, Médiku Internamentu, Octávio Sequeira, relata, ekipa médiku koko sinál vitál hatudu katak matebian hakotu iis ona, nune’e ekipa kontinua halo investigasaun externa hodi halo ezaminasaun iha parte ulun to’o ain atu indentifika fatór externa ruma ne’ebé afeta joven ne’e hakotu iis.
“Maibé bainhira halo ezaminasaun, ami la identifika buat ruma, nune’e ami kontinua halo identifikasaun ba matebian, iha sinál fitar ida iha parte ulun tanba monu hosi talin kona iha semente. Inus ran sai no kabén sai, iha parte kakorok ami haree tali bobar hela, tali nia fukun iha parte matebian nia kotuk,” nia informa.
Nune’e mós, Reprezenta família matebia, Tomas Albino Soares, konta tuir, akontesementu iha dadeer, bainhira família sira matabixu iha uma sorin maizumenus tuku 08:00, hafoin feton ida mak halai fó hatene ema ida halerik iha uma-laran, maibé odamata taka metin.
“Nune’e, ami halai mai uma haree oan tara-an hela iha odamatan. Akontesimentu ne’e ami la deskonfia ema ruma tanba nia rasik xave odamatan mak tara-an. Tanba ne’e, ami família deside la halo autópsia ba matebian, ami la deskonfia ema ruma,” nia hato’o.
Hafoin PNTL ramata halo investigasaun, kontinua kedan entrega mate-isin ba família hodi halo preparasaun ba serimónia fúnebre.
Antes ne’e, joven DGP hala’o estudu iha Ensinu Báziku Sentrál (EBC, sigla portugés) 01 Beloi.
Jornalista : Vitorino Lopes da Costa
Editora : Julia Chatarina
