BAUCAU, 02 outubru 2023 (TATOLI) – Autoridade lokál husu governu reabilita prizaun Kaisahe nune’e bele funsiona ba dadur prozioneiru sira iha sentru leste.
Administradór postu administrativu Baucau Vila, Insencinio António da Silva, esplika, governu deside la utiliza prizaun Kaisahe tanba kondisaun infraestrutura ne’ebé hetan estragu relasiona ho rai-halai nune’e bainhira krize polítika iha tinan-2016 to’o abandona no agora komunidade balun uza hodi hela.
“Munisípiu Baucau presiza duni, ha’u haree kondisaun mak la permite tanba husik de’it ona entaun ema tama arbiru no laiha atensaun,” Administradór postu Baucau Vila hateten iha Vila Antiga, segunda ne’e.
Isencinio da Silva, argumenta, kondisaun rai permite atu prizaun refere hetan atensaun hanesan reabilita nune’e funsiona hikas hodi sai fatin detensaun ba prozioneiru sira hodi kumpre desizaun hosi Tribunál relasiona ho krime ne’ebé halo.
Autoridade lokál ne’e husu governu atu kria planu no aloka orsamentu hodi reabilita hikas prizaun Kaisahe tanba munisípiu Baucau iha ona Tribunál Distritál ne’ebé halo prosesu julgamentu iha área sentru leste no presiza reativa hikas prizaun nune’e hodi akomoda prozioneiru sira hosi munisípiu Lautém, Viqueque no Baucau.
“Ha’u husu Ministériu Justisa atu haree no fo atensaun,” Isencinio da Silva akresenta.
Hosi obervasaun Agência TATOLI iha terrenu nota, kondisaun infraestrutura uma prizaun Kaisahe hanesan odamatan, janela, sela prizaun, kapela, moru inklui kampu voleiból no basketeból hahú estragu tanba durante tinan-17 abandona.
Prizaun Kaisahe lokaliza iha suku Buruma, postu Baucau Vila ne’ebé konstrui iha tempu okupasaun Indonézia no sai sítiu istóriku tanba fatin dadur joventude rezisténsia durante luta ba ukun rasik aan.
Jornalista : Natalino Belo
Editór : Evaristo Soares Martins
