COVALIMA, 02 Outubru 2023 (TATOLI)—Koordenadór Bee Timor-Leste, Empreza Públika (BTL, E.P) Covalima, Castro Dody Ramos, hateten hahú janeiru to’o setembru tinan 2023 ne’e, BTL, E.P Covalima kontribui ona reseita $17,349.4 ba kofre Estadu.
“BTL, E.P Covalima konstribui reseita $17,349.4 ba kofre Estadu ne’e mai hosi font tarefáriu no tékniku BTL, E.P halo ligasaun bee-moos ba uma kain sira no ligasaun ba edifísiu sira,” Castro Dody Ramos hateten ba Agência Tatoli, iha nia kna’ar fatin Sukaer Laran, segunda ne’e.
Tuir tarefáriu ba kliénte ne’ebé tékniku BTL, E.P Covalima dada bee-moos ba uma kain sira ho tipu domestika selu mínimu $55.00 másimu $ 100.00 no ligasaun ba edifísiu sira selu $200.00 depende medida kanu ne’ebé iha.
Bazeia ba dadus hosi BTL, E.P Covalima reseita $17,349.4 ne’ebé kontribui ba kofre Estadu ne’e maiória tékniku sira dada bee-moos ba kliénte sira ho tipu doméstika iha área urbana.
Mekanizmu kliénte selu BTL, E.P Covalima aplika bazeia ba lei, kliénte uza bee-moos metro 14 kúbiku selu sentavu 0,20 ba kliénte uza bee-moos ho tipu doméstika, nune’e kada fulan selu $2,80 sentavu, maibé depende ba kliénte sira uza bee-moos nune’e kada fulan balun selu $1.00-resin no balun selu $2.00-resin.
Tuir dadus hosi BTL, E.P Covalima, kliénte iha área urbana ne’ebé asesu ona bee-moos ho totál xefe família hamutuk 1222 ho totál populasaun na’in-11.533.
Jornalista : Celestina Teles
Editór : Cancio Ximenes
