Deputada CNRT husu Governu apoia tratór ba povu agrikultór
DILI, 02 outubru 2023 (TATOLI)—Deputada hosi bankada CNRT iha Parlamentu Nasionál (PN), Carminda Carlota, husu Governu liuhosi Ministériu Agrikultura no Peska (MAP) atu apoiu tratór ba povu agrikultór.
“Foin daudaun ami ba halo fiskalizasaun iha Lospalos konsege hasoru ho Diretór Agrikultura sira lamenta tebes ho tratór, tanba durante ne’e sira iha tratór hamutuk 45, maibé barak mak aat ona hela 12 mak di’ak. Entaun, loos duni, la to’o sira atu fila rai no halo natar iha Lospalos. Nune’e, husu ministériu kompetente tau asuntu ne’e bele aumenta tan tratór ba iha munisípiu Lospalos,” Deputada ne’e levanta liuhosi reuniaun plenária PN, segunda ne’e.
Nia dehan, ohin loron ema hotu preokupa ho folin foos sa’e, tanba durante ne’e ita depedénsia makaas ba produtu importasaun, maibé ita-nia rai ne’e luan tebes hanesan iha Lospalos, Maliana, Baucau iha natar barak, nune’e husu MAP hadi’a mekanizmu serbisu hodi hasa’e produsaun protudu rai-laran.
Deputada FRETILIN, Maria Angélica Rangel, hateten iha Same-Fatuberliu, Natarbora no Viqueque ne’e iha tratór sira-ne’ebé mak uluk Governu sosa tau iha sentru agrikultura daudaun ne’e laiha manutensaun.
“Ne’ebé, nia dehan, urjentemente halo manutensaun tanba agora tama ona iha faze hamoos to’os no natar, atu nune’e bele kuda iha tempu oin mai,” nia hateten.
Iha parte seluk, Depuatda FRETILIN, Cristina Rebelo, levanta kona-ba irrigasaun iha Manatuto tanba foin daudaun hala’o fiskalizasaun ne’e povu halerik ba irrigasaun nafatin aat, nune’e husu Governu bele tau orsamentu hodi hadi’a lalais irrigasaun hirak ne’e.
Hatán ba kestaun ne’e, Vise Ministru ba asuntu Parlamentár, Adérito Hugo da Costa, rejista preokupasaun hirak ne’e no sei hato’o ba ministériu tutela.
Jornalista : Nelson de Sousa
Editór : Cancio Ximenes
