Deputada CNRT preokupa ba konstrusaun kampu multifunsaun iha Taibessi

DILI, 02 outubru 2023 (TATOLI)–Deputada hosi bankada CNRT iha Parlamentu Nasionál (PN), Bendita Monis Magno, preokupa ba prosesu konstrusaun kampu multifunsaun iha Taibesi, Dili, ne’ebé paradu hela..

Notísia Relevante: Empreza la konklui kampu multifunsaun Taibesi iha marsu SEJD hapara kontratu

“Kampu multifunsaun iha Taibesi, ita tau orsamentu iha OJE 2022 nian, iha ne’eba tau rihun $220. Ita hakarak halo kampu multifunsaun ne’e no sira asina kontratu ne’e iha fevereiru 2022, kampu ne’e nia ramata iha dezembru tinan kotuk maibé to’o agora sobu tiha buat hotu no halo rahun hatun ona. Ema-ne’ebé faan obralan iha ne’eba mós hasai hotu ona no to’o agora kampu ida-ne’e husik hela hanesan ne’eba,” Deputada ne’e levanta liuhosi reuniaun plenária PN, segunda ne’e.

Tanba ne’e, nia husu ba Ministériu Juventude Desportu, Arte no Kultura (MJDAK) atu haree fila-fali projetu konstrusaun refere.

Deputadu CNRT, Gabriel dos Santos, mós preokupa konstrusaun estádiu ka kampu multifunsaun iha Taibesi.

Nune’e mós, nia mós preokupa ba konstrusaun estádiu municipal iha munisípiu Manatuto, nune’e husu Governu atu tau atensaun.

Vise Ministru ba asuntu Parlamentár, Adérito Hugo da Costa, rejista preokupasaun ne’e no sei hato’o ba ministériu tutela.

Jornalista : Nelson de Sousa

Editór       : Cancio Ximenes