DILI, 02 outubru 2023 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia, Henrique da Costa, dehan Komandu planeia sei halo leilaun ba viatura sira ne’ebé konsidera tama ona ba leilaun no planu atu halo fali akizisaun foun.
“Komandu PNTL rejista karreta hamutuk 163, karreta hirak ne’e Komandu sei halo leilaun, tanba sira-ne’e maioria kondisaun aat ona no labele halo manutensaun, kuandu halo manutensaun ba karreta ida ho valór $ 1.800, tanba ne’e difisil para halo manutensaun no reparasaun ba karreta ne’ebé tuan, tanba ne’e Komandu halo ona levantamentu karreta hamutuk 163 no tempu badak ita halo leilaun ba karreta sira ne’e”, Henrique da Costa, hateten ba jornalista sira iha Kuartel Jerál PNTL, segunda ne’e.
Tuir nia, iha orsamentu retifikativu 2023 no OJE 2024, Komandu sei proposta osan ba karreta hodi susbstitui fali veíkulu tuan sira ne’ebé tama ona iha leilaun.
“Iha tinan oin ita sei hato’o tán pedidu ba Governu atu halo akizasaun ba karreta balun hodi substitui karreta hirak ne’ebé tama ona ba leilaun”, nia dehan.
Jornalista: Natalino Costa
Editór : Zezito Silva
