Meza PN baixa proposta alterasaun lei kriasaun RAEOA ba komisaun espesializada
DILI, 02 outubru 2023 (TATOLI)—Meza Parlamentu Nasionál (PN), segunda ne’e, liuhosi reuniaun plenária anunsiu admisaun baixa proposta lei kriasaun RAEOA no estabelese ZEESM no Ataúro
PN baixa proposta lei númeru 2/VI (1a) kona-ba alterasaun datoluk lei númeru 3/2014, 18 juñu, ne’ebé kria Rejiaun Administrativa Espesiál Oé-Cusse Ambeno (RAEOA) no estabelese Zona Espesiál Ekonómia Sosiál Merkadu Oé-Cusse Ambeno no Ataúro ba iha komisaun espesializada sira hodi halo apresiasaun inisiál.
Notísia Relevante: Konsellu Ministru altera lei kriasaun RAEOA no ZEESM
“Baixa ba komisaun A trata asuntu Justisa no Konstituisionál, Komisaun B trata asuntu Negósiu Estranjeiru no Defeza ho Seguransa, Komisaun C trata asuntu Finansa Públika no komisaun D trata asuntu Ekonómia no Dezenvolvimentu proposta lei númeru 2/VI (1a) kona-ba alterasaun datoluk lei númeru 3/2014, 18 juñu, ne’ebé kria Rejiaun Administrativa Espesiál Oé-Cusse Ambeno no estabelese Zona Espesiál Ekonómia Sosiál Merkadu Oé-Cusse Ambeno no Ataúro,” Prezidente Parlamentu Nasionál, Maria Fernanda Lay, hateten iha sala plenária PN.
Nia hateten, meza mós baixa komisaun A projetu-lei númeru 2/VI (1a) kona-ba alterasaun datoluk lei númeru 5/2004, 05 maiu, Estatutu Deputadu.
Nune’e mós baixa mós ba komisaun A, B, C, D ba proposta-lei númeru 3/VI (1a), kona-ba alterasaun dahaat lei númeru 11/2009, 07 outubru, ne’ebé aprova Divizaun Administrativa Territóriu.
Prezidente PN me’e husu ba komisaun espesializada sira atu fó prioridade trata inisiativa lei tolu ne’e, tanba importante tebes liga ho diskusaun Orsamentu Jerál Estadu (OJE) 2024 mai.
Fernanda Lay seidauk esplika konteúdu inisiativa lei tolu ne’e tanba komisaun espesializada sira sei halo apresiasaun inisiál hafoin aprezenta relatóriu no paresér.
Jornalista : Nelson de Sousa
Editór : Cancio Ximenes
