Ahi han edifísiu saúde Baucau
BAUCAU, 03 outubru 2023 (TATOLI) – Inséndiu iha Riamare, suku Bahú, postu administrativu Baucau Vila, munisípiu Baucau, rezulta edifísiu Serbisu Munisipál Saúde Baucau hetan estragu.
Funsionáriu Departamentu Saúde Maternidade Infantil, Maria Alice da Costa, nu’udar sasin haktuir, inséndiu refere akontese purvolta meudia oras 12:00-resin bainhira maioria funsionáriu sira fila ba uma tanba tempu deskansa.
Nia hatutan, bainhira tuur hela iha sala serbisu fatin haan hotu meudia maibé akompaña horon ahi-suar no buka atu hatene nune’e bainhira haree inséndiu iha kurridór entaun halai sai hodi husu ajuda ba komunidade.
“Ha’u la hatene kauza saida, ha’u haree ahi-su’ar entaun halai sai hodi hakilar dehan ahi-haan edifísiu nune’e komunidade sira mai ajuda inklui hamate prepagu,” Maria Alice da Costa hateten iha Vila Antiga, segunda ne’e.
Nia parte ho komunidade konsege hamutuk salva dokumentu inklui evakua sasán ofísiu no halo kontaktu ba parte Bombeiru hodi hamate ahi.
Nia hato’o sentimentu triste no rekomenda ba institusaun relevante hanesan Ministériu Saúde atu identifika kauza hosi inséndiu ne’e nune’e bainhira reabilitasaun bele halo prevensaun.
Hosi observasaun TATOLI iha terenu nota, hún hosi ahi mai hosi fatin dormitóriu ne’ebé deskonfia mosu konslete elétrika no kulisaun ne’ebé iha fasil atu mosu inséndiu.
Inséndiu ne’e rezulta edifísiu Serbisu Munisipál Saúde Baucau hetan estragu hosi parte internál hanesan sala dormitóriu estragu totál, fatin rai vasina, departamentu nutrisaun, departamentu malária no seluk tan.
Edifísiu Serbisu Munisipál Saúde konstrui iha tempu portugés utiliza ba ospitál jerál no kontinua iha tempu okupasaun Indonézia funsiona nu’udar ospitál militár.
Jornalista : Natalino Belo
Editór : Evaristo Soares Martins
