Aimoruk item 42 iha farmásia SSM Covalima “stock out”
COVALIMA, 03 Outubru 2023 (TATOLI)—Diretora Servisu Saúde Munisípiu Covalima, Maria Fátima Moniz, hateten aimoruk konsumavél ho tipu aimoruk vitál, esensiál no non esensiál tipu aimoruk item 42 “stock out” iha Farmásia Servisu Saúde Munisípiu (SSM) Covalima.
“Tipu aimoruk vitál, esensiál no non esensiál tipu aimoruk item 42 ho 16,3% stock out iha Farmasia Servisu Saúde Munisípiu Covalima ne’ebé ita hato’o ona pedidu ba iha rejionál,” Maria Fátima Moniz hateten ba Agência Tatoli iha nia servisu fatin Camanasa, tersa-ne’e.
Tuir matadalan, aimoruk iha Farmasia Servisu Saúde Munisípiu Covalima hamutuk item 262 no hosi ne’e item hirak ne’e, tipu aimoruk vitál esensiál ho non esensiál aimoruk item 42 “stock out” iha farmasia servisu saúde munísipiu Covalima.
“Servisu saúde mós submete ona pedidu no foin lalais aimoruk foin tama, ha’u seidauk konfirma ho sira, tipu aimoruk hira mak famasia rejionál labele atende ita-nia pedidu,” nia dehan.
Tanba, nia hatetenm tipu aimoruk vital stock out labele liu loron 15 tenke buka meiu hanesan aimoruk Adrenaling, esensiál mak Amoxcilin no Pracetamol liu durante loron 15 bele buka solusaun no non esensiál hanesan pomada (salep) la fó impaktu ema-nia vida, buka neineik bele kompleta.
“Aimoruk item 42 stock out hanesan ha’u temi, sira bele buka meiu tanba kada loron farmásia iha sentru saúde sempre relata molok atu halo tratamentu sei check aimoruk, tipu saida de’it mak iha farmásia nune’e médiku halo konsulta koordena ho farmásia,” nia hateten.
Antes ne’e, iha loron 26 fulan-setembru tinan 2023 ne’e, Diretór Armajenamentu Servisu Autónoma Medikamentu Ekipamentu Saúde (SAMES), Octavio Fernades, hateten SAMES iha ona stock aimoruk tanba iha armajen 80% no stock out 20%.
Jornalista : Celestina Teles
Editór : Cancio Ximenes
