DILI, 03 outubru 2023 (TATOLI) – Estudante na’in-30 husi Eskola Bázika Filiál (EBF) 12 de Outubro iha Tasi Tolu partisipa iha atividade hamenus lixu plástiku iha eskola ne’ebé implementa husi Organizasaun Naun-Governamentál Permakultura Timor-Leste (PERMATIL) no Mercy Corps.
Atividade hamenus lixu plástiku ne’e nia objetivu mak muda konsiénsia ema nian hahú husi buat ne’ebé ki’ik, liuliu ba labarik sira atubele hatene katak bainhira konsumu plástiku barak liu bele fó impaktu ba ema nia saúde nomós ambiente iha eskola.
Responsavel Programa Hamenus Lixu Plástiku husi PERMATIL, Armindo de Jesus, hatete atividade ne’ebé sira implementa iha EBF 12 de Outubro ne’e iha nia dezeña hamutuk 12 no bazeia ba sílabu ne’ebé iha.
Atividade 12 ne’e mak ko’alia kona-ba tasi, oinsá labarik sira-nian hatene sobre tasi no saida maka sira haree no observa iha tasi; konkursu mellór fraze ka best line survey, bainhira sira bá uma halo lista kada loron konsumu plástiku ba sira-nia aan ne’e hira depois aprezenta fali ba PERMATIL no Mercy Corps hodi halo sai dadus ida; atividade hili plástiku bazeia ba orientasaun ka giaun ida atu labarik sira bele la’o tuir; atividade sura plástiku mak lixu ne’ebé labarik sira halibur ona no sura filafali. Maioria plástiku sira iha resintu eskola ne’e barak liu maka lixu ida ne’ebé, nune’e bele hatene ona katak durante ne’e EBF 12 de Outubru konsumu liu maka lixu plástiku karamelu nian.
Atividade seluk mak uza kantíl ne’ebé mak PERMATIL no Mercy Corps kria múzika ida ho títulu “O kantíl” ne’ebé hanaran karoke kantíl. Múzika kantíl ne’e nia letra hakerek husi kantór Ego Lemos ho nia arranjamentu foti de’it husi múzika “O Timor”. Múzika ne’e hanesan kampaña ida atu labarik sira bele kanta iha eskola hodi bele influensia fali kolega sira seluk.
Iha mós atividade siklu plástiku ne’ebé ko’alia kona-ba sirkulasaun hahú husi ne’ebé, bá ne’ebé no to’o iha ne’ebé no atividade seluk tan.
“Atividade ne’e ita realiza durante fulan agostu no remata iha outubru. Ita implementa kada semana ba labarik na’in-30 ne’ebé ita hili iha loron sábadu de’it nune’e labele prejudika sira-nian atividade aprendizajen”, Armindo de Jesus dehan ba Tatoli iha Tasi Tolu, ohin.
Estudante Jivanio da Cruz haktuir katak atividade formasaun ne’ebé nia hetan durante fulan tolu ne’e konsidera hanesan estra ida ba sira na’in-30 ne’ebé selesionadu husi eskola, tanba bele hetan matéria ida ne’ebé di’ak ba saúde ligadu ho oinsá partisipasaun estudante nian atu kontribui ba hamenus lixu plástiku iha nasaun, liuliu iha EBF 12 de Outubro.
“Hanesan estudante sei hamutuk ho kolega sira seluk atu kontinua influensia kolega sira seluk, nune’e bele kontribui hamenus lixu plástiku iha eskola liuhusi uza kantíl”, dehan.
Ministra Edukasaun, Dulce de Jesus, sente kontente tanba atividade hamenus lixu plástiku ne’ebé PERMATIL no Mercy Corps halo iha eskola ne’e di’ak tebes atu nune’e bele tulun labarik sira oinsá hatene kuidadu ambiente eskola no labele soe lixu arbiru.
“Ha’u kontente tanba ohin ha’u koko husu ona ba labarik sira kona-ba sira-nian koñesimentu ba prevensaun lixu plástiku ne’e di’ak tebes”, katak.
Governante ne’e husu ona ba organizasaun rua ne’e atu kontinua serbisu hamutuk ho Ministériu Edukasaun, nune’e atividade bele la’o di’ak liután, tanba prevensaun lixu ne’e mós konsagra ona iha kurríkulu ministériu nian.
Jornalista: Tomé Amado
Editora: Maria Auxiliadora
