Assanami ho PDHJ troka hanoin direitu sidadaun ba moris di’ak
DILI, 03 outubru 2023 (TATOLI) – Vise Primeiru-Ministru, Ministru Kordenadór Asuntu Sosiál no Ministru Dezenvolvimentu Rurál no Habitasaun Komunitária Mariano Assanami Sabino hasoru malu ho Provedór Direitu Umanu no Justisa (PDHJ) Virgílio Guterres troka hanoin kona-ba direitu sidadaun sira-nian atu asesu ba moris di’ak.
“Hasoru malu ne’e atu hato’o hanoin balun, troka hanoin kona-ba saida mak ba futuru PDHJ no Governu bele koopera hamutuk liuliu iha asuntu sosiál nian”, Virgílio dehan ba jornalista sira iha Palásiu Governu, tersa ne’e.
Sorumutu ne’e, PDHJ aprezenta mós preokupasaun balun relasiona ho direitu umanu ne’ebé ho direitu ekonómiku sosiál no kulturál.
“Ita-nia Estadu ratifika ona konvensaun kona-ba direitu ekonómiku, sosiál no kulturál nian mak Estadu iha obrigasaun kumpre kompromisu ida-ne’e ba nia sidadaun sira, direitu sosiál ekonómiku no kulturál ne’e implika katak direitu povu nian atu hetan moris di’ak, direitu atu hetan abitasaun ka uma ne’ebé dignu ba sira atu moris, ida-ne’e mak ohin ami ko’alia hodi troka hanoin ba malu”, nia hatete.
“Abitasaun ne’e la’os de’it uma ba populasaun, maibé iha kapitál Dili ne’e harii mós rezidénsia Universitária ba estudante atu bele fasilita joven sira ne’ebé tun hosi foho mai hela hodi hala’o prosesu aprendizajen”, nia dehan.
Aleinde ne’e, parte rua diskute mós bee-moos liuliu iha Dili ne’ebé ho populasaun ne’ebé barak moris depende ba esforsu rasik no sempre hasoru problema bee-moos.
“Iha Dili ne’e ita-nia komunidade sira atu hetan bee-moos tenke liuhosi esforsu rasik, sira dada bee rasik, fura bee rasik, entaun nia implikasaun ba longu prazu bele estraga prezervasaun bee ne’ebé iha ita-nia rai, ida-ne’e mak Governu tenke halo intervensaun oinsa bele garante bee-moos ba públiku”, nia relata.
Iha okaziaun ne’e, diskute mós kona-ba área edukasaun nian katak Governu tenke inisia hodi finaliza esforsu ne’ebé Governu anteriór sira halo kona-ba polítika kuríkulum Ensinu Báziku nian atu ba oin bele iha ona kuríkulum ida apropriadu ba era dijitalizasaun.
“Direitu dijitál sai hanesan komponente ida ne’ebé importante iha tempu agora bainhira ita halo kampaña kona-ba respeita direitu umanu nian, iha área edukasaun no seluk tan”, nia revela.
PDHJ relata planu servisu ba Vise-PM Assanami
Virgílio Guterres relata planu no servisu ba Vise Primeiru-Ministru Mariano Assanami Sabino ne’ebé foka liubá asuntu fiskalizasaun ba polítika Governu nian.
“Ami aprezenta planu hanesan Provedór foun atu hadia servisu ami-nian foka iha área fiskalizasaun, asuntu politika Governu nian tanba PDHJ hanesan entidade Estadu ne’ebé iha funsaun dupla mak proteje direitu umanu no funsaun atu promove boa governasaun”,
Nune’e mak reforsa komponente análize sosiál, análize legál atu bele fó referénsia ba Provedór atu halo intervensaun ne’ebé kualidade perante Parlamentu ou Governu liuliu iha setór edukasaun, saúde, agrikultura no justisa sai foku ba fiskalizasaun Provedór nian tinan ida-ne’e ba oin.
“Ami informa mós katak PDHJ foin remata elabora planu estratéjiku 2024-2028 nian, iha planu estratéjiku ne’e implika mudansa ba lei orgánika no transformasaun ba rejime servisu ninian ne’ebé PDHJ moris ho rejime jerál, ida-ne’e mak ami ko’alia ba Vise Primeiru-Ministru atu fó apoiu iha diskusaun kona-ba transformasaun iha Konsellu-Ministru ba rejime espesiál ho objetivu atu garante di’ak liután independénsia no integridade ami-nia investigadór sira atu halo investigasaun”, nia informa.
Jornalista: Hortencio Sanchez
Editór : Zezito Silva
