Baucau sei rejista kandidatu xefe suku iha semana oin

BAUCAU, 03 outubru 2023 (TATOLI) – Sekretariadu Tékniku Administrasaun Eleitorál (STAE) sei loke rejistrasaun ba kandidatura xefe suku iha loron 13 fulan-outubru.

Diretór STAE Baucau, Natividade Freitas, esplika, antes simu naran kandidatura autoridade suku, prosesa dahuluk kria uluk meza eleisaun iha dadeersan oras 08:00 hafoin loke rejistrasaun iha oras 10:00 to’o meudia oras 01:00 otl.

“Tempu mak ne’e de’it, liu ida-ne’e labele ona,” Diretór STAE Baucau hateten iha Vila Nova, tersa ne’e.

Bainhira kandidatura sira-ne’ebé selesionadu prienxe rekizitu, STAE sei kontinua kedas atu prodús boletin votu hanesan rekolla fotografia no forma naran tuir alfabetizasaun nune’e haruka ba nasionál atu halo emprime.

Enkuantu prosesu rejistrasaun ba kandidatura xefe aldeia, delegadu no delagada sira sei aprezenta iha loron eleisaun nune’e sei taka fotografia kandidatura iha kabina no eleitór sira sei vota naran iha buletin ne’ebé prepara ona hosi ekipa tékniku sira iha sentru votasaun.

STAE Baucau garante prosesu eleisaun suku iha Baucau sei laiha fallansu tanba eleisaun suku akontese ona ba dalarua, maske iha iha tinan 2016 governu foin hamosu lei númeru 9/2016 kona-ba xefe suku ne’ebé seidauk sosializa ho másimu.

“Ita garante sei la mosu fallansu,” Natividade Freitas argumenta.

Eleisaun suku sei akontese iha loron-28 outubru no iha munisípiu Baucau tuir planu sei realiza eleisaun iha suku hamutuk 59 hosi totál postu administrativu neen hanesan Baucau Vila, Baguia, Laga, Quelicai, Venilale no Vemasse.

Jornalista    : Natalino Belo

Editór           : Evaristo Soares Martins