Top

Deputada CNRT husu Governu presiza konstrui sintina públiku

Sintina públiku iha snal Dili hahú loke ba públiku. Imajen Tatoli/Nelia Fernandes.

DILI, 03 outubru 2023 (TATOLI)—Depuatada hosi bankada CNRT iha Parlamentu Nasionál (PN), Maria Gorumali Barreto, husu Governu presiza konstrui sintina públiku iha fatin públiku sira iha kapitál Dili no iha munisípiu sira.

“Preokupasaun sintina públiku, tanba ita Timor-Leste seidauk konstrui sintina públiku iha fatin públiku liuliu iha merkadu, terminal, iha fatin públiku sira iha nasionál, munisípiu no postu administrativu sira,” Maria Gorumali Barreto levanta kestaun ne’e liuhosi reuniaun plenária PN, tersa ne’e.

Ezemplu, nia hateten, liuliu viajen hosi Dili ba Maliana, Same, Lospalos, Viqueque, presiza iha sintina públiku ruma ba pasajeiru sira-ne’ebé mak halo viajen asesu bainhira sira presiza.

“Haree observasaun ne’ebé iha talves difikulta mós ema hotu. Se auguenta la soe bee (mii) ho situasaun ne’ebé ho oras ba oras sei afeta mós ba ita-nia saúde, liuliu ba moras rins. Ne’ebé, rekomenda ba IX Governu iha oinsá programa liuliu iha Orsamentu Jerál Estadu (OJE) 2024 bele tau prioridade mós ba asuntu ne’e,” nia hateten.

Deputadu KHUNTO, Luís Roberto, fó apresiasaun ba autoridade munisípiu Dili ne’ebé halo jestaun merkadu di’ak duni kuaze komunidade hotu-hotu kompreende ona hala’o atividade negósiu faan duni iha fatin ne’ebé bele faan, maibé husu nafatin atu kontrola mós iha merkadu Taibesi/

“Tanba, bainhira ita atu ba hola buat ruma tama ba iha ne’eba, dalaruma dada iis problema uitoan tanba iis makaas. Presiza tau máskara, ne’ebé presiza haree jestaun hamoos merkadu. Se bele, labele autoriza ita-nia komunidade sira toba iha ne’eba,” nia hateten.

Deputadu hosi Bankada PD, António da Conceição ‘Kalohan’, foti kestaun estasionamentu transporte públiku iha Dili.

“Dili ne’ebé sai sentru ba buat hotu, transporte públiku ne’ebé mai hosi munisípiu sira makaas tebes atu lori populasaun tun mai buka sira-nia nesesidade iha Dili. Buat ne’ebé falta mak estasionamentu transporte. Karik, Governu agora presiza hahú hanoin ona oinsá mak haree estasionamentu. Merkadu Taibesi pratikamente iha dadeer ka lorokraik ita la konsege atu ba sosa sasán iha ne’eba tanba karreta barak demais. Nune’e, husu bele identifika ona fatin iha Tibar, Hera, nune’e mós sentru ninian hodi bele aranja ona fatin,” nia dehan

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!