Deputadu Luís Roberto husu Governu hadi’a irrigasaun iha Venilale
DILI, 03 outubru 2023 (TATOLI)—Deputadu bankada KHUNTO iha Parlamentu Nasionál (PN), Luís Roberto, husu Governu liuhosi Ministéiru Agrikultura (MAP) atu hadi’a irrigasaun iha postu administrativu Venilale, munisípiu Baucau, hodi fasilita povu agrikultór halo natar no hasa’e produsaun.
“Ba IX Governu atu hasa’e produsaun haree iha Timor ne’e, maibé presiza hadi’a irrigasaun hodi fornese bee ba povu agrikultór sira-nia natar. Ha’u kestiona nafatin, iha Venilale ne’eba ne’e, natar kuaze ektare 200-resin ne’ebé mak utiliza bee mota ninian hodi halo natar ne’e, tempu udan uza udan been, maibé tempu bailoron uza bee mota. Maibé iha tinan kotuk la halai natar, hodi utiliza kuda batar no tomate sira-ne’e abandona, tanba bee laiha. Tanba ne’e, husu Governu atu hadi’a lalais irrigasaun iha Venilale,” Luis Roberto levanta liuhosi reuniaun plenária PN, tersa ne’e.
Nune’e, nia hateten, MAP presiza tau atensaun hodi hadi’a irrigasaun hodi fasilita povu agrikultór hasa’e produsaun iha rai laran.
Deputadu CNRT, Saul Amaral, hateten semana kotuk halo fiskalizasaun iha munisípiu Baucau haree irrigasaun Governu presiza tau atensaun.
Iha parte seluk, Deputada RETILIN, Helena Martins, hakarak fó hanoin ba Governu oinsá mak halo investimentu ba seguransa alimentár tanba ho situasaun bailoron naruk ne’e.
Jornalista : Nelson de Sousa
Editór : Cancio Ximenes
