DILI, 03 outubru 2023 (TATOLI) – Diretora Ezekutiva Hospitál Nasionál Guido Valadares (HNGV) Cecilia Barros Mendonça, husu ba profisionál saúde sira atu halo atendimentu ba pasiente sira ho domin no oin midar.
”Ha’u husu ba profisionál saúde sira hodi fó atendimentu ho domin, komunikasaun ho pasiente tenke ho di’ak, tanba ita atende pasiente tenke oin midar no nakonu ho domin”, Diretora Ezekutiva HNGV Cecilia Barros informa bainhira ramata semináriu loron mundiál pasiente seguru ho tema hasae pasiente nia lian ba pasiente nia seguransa’’, nia dehan iha HNGV, ohin.
Atividade ohin ne’e hodi selebra loron mundiál pasiente seguru, entaun profisionál saúde sira tenke kuidadu pasiente sira ne’ebé mak baibain mai halo tratamentu iha HNGV ida-ne’e.
Iha fatin hanesan, Vise Ministru ba Operasionalizasaun Ospitál Flavio Brandão Mendes, hateten komponente ne’ebé mak importante tebes iha pasiente nia seguransa mak ambiente servisu tenke saudavél hodi garante pasiente seguru.
Nia haktuir, lideransa sira mós tenke haree pesoál saúde nia seguransa no mós pasiente nia seguransa, ita tenke haree no halo intervensaun sira ba ida-ne’e hodi bele halo servisu ho responsabilidade.
Reprezentante Organizasaun Mundiál Saúde iha Timor Leste Vinay Bothra, dehan tinan-tinan ema barak tebes mak mate iha ospitál tanba aspetu sira ne’ebé relasiona ho seguransa pasiente nian. Aimoruk ne’ebé fó sala, mal prátika, liman ne’ebé la los no asaun sala seluk bele kauza perigu ba pasiente, maske la iha intensaun.
“Seguransa ba pasiente krítiku ka importante tebes, ohin loron ita hanesan médiku, maibé aban ita bele sai fali pasiente, nune’e mai ita hotu hamutuk, buka dalan atu asegura katak sempre tau asuntu ida-ne’e hanesan prioridade. Espera katak iha semináriu ida-ne’e ita bele aprende hamutuk no halo servisu ida-ne’e sai di’ak liután”, Vinay Bothra konklui.
Jornalista : Felicidade Ximenes
Editór : Zezito Silva
