Tékniku BTL, E.P instala ona kontadór 319 ba kliénte sira iha Covalima
COVALIMA, 03 Outubru 2023 (TATOLI)—Bee Timor-Leste, Empreza Públika (BTL, E.P) Covalima, Castro Dody Ramos, hateten Tékniku Bee Timor-Leste, Empreza Públika (BTL, E.P) Covalima instala ona kontadór bee hamutuk 319 ba kliente sira iha área urbana.
“Ita agora halo melloramentu sistema bee-moos, nune’e ita monta ona kontadór iha zona haat área urban. Ne’ebé, faze dahuluk ita finaliza ona hodi monta kontadór hamutuk 319 ba kliente iha área urbana,” Castro Dody Ramos hateten ba Agência Tatoli iha nia kna’ar fatin Sukaer Laran, tersa ne’e.
Tékniku BTL, E.P instala kontadór 319 ne’e instala iha zona haat hanesan iha zona dahuluk instala kontadór 28, zona daruak instala kontadór 10, zona datoluk instala kontadór 118 no zona ba data instala ona kontadór 163.
Aleinde ne’e, tékniku BTL, E.P Covalima instala ona kontadór 319 ba kliente hamutuk 1,222 iha área urbana munisípiu Covalima, maibé kliente balun tékniku sira seidauk instala kontadór hamutuk 903.
Kontadór ne’ebé tékniku sira instala ba kliente sira ho tipu sira hanesan tipu kontadór domestika hanesan dada bee-moos ba uma kain sira hamutuk-286, tipu kontadór jerál ba emprezáriu no edifísiu hamutuk 30, sosiál instituisaun (SI) hanesan ba eskola no igreja no tanke públiku (TP).
Tuir planu, tékniku sira sei kontinua instala tan kontadór ba faze daruak no kompañia ne’ebé implementa projetu instala kontadór 1500, nune’e kliente uza bee-moos ho di’ak nune’e distribui bee-moos ba kliente tuir tipu.
Jornalista : Celestina Teles
Editór : Cancio Ximenes
