Agrikultura Baucau simu ona fini batar hosi nasionál

BAUCAU, 04 outubru 2023 (TATOLI) – Serbisu Munisipál Agrikultura Baucau simu ona fini batar hosi nasionál liuhosi Asosiasaun Nasionál Fini Komersiál Timor-Leste (ANAPROFICO-TL).

Xefi Departamentu Produsaun Alimentár Agrikultura Baucau, Leonor de Almeida Araújo, esplika, serbisu agrikultura Baucau simu ona fini batar hamutuk tonelada hitu no atuál kontinua prepara atu distribui tutan ba agrikultór sira iha postu administrativu neen.

“Sei halo planu bainhira hotu no sei kaundu kontaktu ba koordenadór sira ne’e, ita sei distribui ona ba sira,” Xefe Departamentu Produsaun Alimentár Agrikultura Baucau hateten iha Vila Nova, tersa ne’e.

Leonor Araujo, hateten, koordenadór postu mak sei kontinua distribui ba komunidade agrikultór sira-ne’ebé presiza fini batar atu kuda iha époka tinan-ne’e.

Sekretáriu jerál ANAPROFICO-TL, Joanico José Ximenes , esplika, governu liuhosi Ministériu Agrikultura, Pekuária, Peskas no Florestrál, planeia sosa fini batar hamutuk tonelada 120 maibé realidade produsaun hosi agrikultór hamutuk tonelada 79 de’it tanba fatór klima.

“Distribuisaun fini fase dahuluk tonelada 79, ita sei kontinua esforsu époka dalaruak garante katak sei atinje to’o tonelada 120,” Joanico Xiemnes hateten.

Fatór redusaun ba produsaun fini batar hosi agrikultór mak mudansa klimátika iha mundu ne’ebé afeta mós ba Timor-Leste no batar hetan atake hosi peste.

Fini batar ne’ebé distribui iha variedade tolu kompoostu noi mutin, nai no sele ne’ebé iha distribusaun faze dahuluk kada munisípiu sei simu tonelada hitu.

ANAPROFICO-TL kontinua akompaña distribusaun fini batar hosi kompañia nune’e bele hatene kuantidade no kualidade fini ne’ebé tenki liuhosi laboratóriu nasionál Ministériu Agrikultura.

Jornalista    : Natalino Belo 

Editór          : Evaristo Soares Martins