DILI, 04 outubru 2023 (TATOLI) – Konstrusaun edifísiu foun ba Institutu Nasionál Siénsia no Teknolojia (INCT, sigla portugés) ne’ebé sei halo durante fulan tolu, entre agostu no novembru, foin atinje 15%.
INCT prevee 28.681,72 ba konstrusaun edifísiu ida ne’ebé kompostu husi ba sala enkontru ne’ebé bele akumula ema 50, sala ba prezidente no seluk tan.
“Konstrusaun ida ne’e ita halo tanba nesesidade serbisu maka obriga atu iha tan espasu foun hodi garante serbisu idak di’ak liután ba INCT. Ita realiza ona konstrusaun ne’e no hein katak novembru tinan ne’e bele konklui ona atu ita bele uza”, Prezidente tutela, José Cornélio Guterres, hatete ba Tatoli iha Balide, ohin.
Obra ne’e konstrui husi empreza Babamula Bee-Hali no garante katak sei entrega edifísiu foun ne’e ba INCT tuir tempu ne’ebé determina.
“Ne’e la’ós projetu boot ida tanba ne’e ha’u fiar iha fulan tolu nia laran ne’e sira bele entrega ona edifísiu ne’e mai INCT hodi bele uza”, espera.
Ba tinan oin, INCT mós hatama ona planu orsamentu ba konstrusaun edifísiu foun ne’ebé sei halo iha área Palásiu Prezidente Repúblika nian ho montante rihun $100-resin. Orsamentu ne’e sei uza hodi prepara ba dezeñu ba edifísiu inklui estudu viabilidade. Orsamentu ne’e sei prevee tuir nia etapa.
“Ita prevee ona orsamentu rihun $100-resin ne’e iha ita-nian planu ba tinan oin, maibé depende ba desizaun tuirmai. Kuandu aprova, ita agradese no bele uza hodi implementa planu sira, maibé la’e ita kontinua hala’o serbisu tuir buat ne’ebé ita enfrenta”, dehan.
Lembra katak orsamentu ba INCT nian iha tinan ne’e hamutuk $552.177 ne’ebé aloka ba programa prioridade hanesan governasaun di’ak no jestaun, edukasaun no formasaun, ne’ebé akumula sub-programa lima no atividade sia.
Jornalista: Tomé Amado
Editora: Maria Auxiliadora
