DILI, 04 outubru 2023 (TATOLI) – Diretór Servisu Edukasaun Munisípiu Manatuto, Graciano Batista, husu ba Institutu Nasionál Formasaun Dosente no Profisionál Edukasaun Timor-Leste (INFORDEPE, sigla portugés), atu taka sentru formasaun ba língua portugeza iha Laleia tanba laiha ona atividade.
Antes ne’e sentru disponibiliza formasaun nivel B1 ba manorin 37. Hafoin sira pasa ba B2, profesór sira lapartisipa ona formasaun ne’ebé loloos ne’e hahú iha jullu. Maibé, tama ona ba fulan rua resin sira la marka prezensa, tanba ne’e presiza foti medida.
“Ita hakerek ona karta ba Koordenadór PRO Portugês, tanba ita halo ona observasaun bá iha sentru formasaun ne’e laiha ona atividade formasaun [língua] portugeza nivel B2. Tanba ne’e ita relata mai nasionál atu taka tiha sentru ne’e hodi muda fali mai Manatuto Vila”, diretór ne’e dehan ba Tatoli iha Vila Verde, ohin.
Pedidu muda sentru formasaun ba Manatuto Vila ne’e ho intensaun atu fó biban fali ba formadór sira disponibiliza fali formasaun ba manorin sira iha fatin refere.
Antes ne’e parte Edukasaun Manatuto halo esforsu hodi enkoraja profesór 37 atu kontinua formasaun B2 tanba sira iha devér atu hetan kapasitasaun hodi hasa’e sira-nian koñesimentu.
“Ami-nian papél kontinua halo konfirmasaun ho profesór sira, maibé sira lakohi tuir, entaun sei iha sansaun ruma maka ami sei halo maka avalia sira-nian dezempeñu serbisu tomak”, dehan.
Koordenadór PRO Portugês, Armindo de Jesus, salienta nia simu ona karta ne’ebé diresaun servisu edukasaun Manatuto submete, maibé nia seidauk bele foti desizaun tanba presiza halo observasaun no halo fali aprosimasun ho profesór sira.
“Ha’u foin halo konfirmasaun ho koordenadór iha sentru formasaun Laleia nian katak profesór sira deside la tuir ona formasaun ne’e tanba sira fahe tempu ladi’ak. Dadeer bá hanorin no loraik tuir formasaun ka dadeer tuir formasaun loraik bá hanorin. Ida ne’e maka prejudika sira-nian tempu”, esplika.
Nia dehan bainhira ekipa halo ona identifikasaun maka hetan duni katak sentru formasaun ne’e abandonadu, parte nasionál sei deside tuir ezijénsia edukasaun munisipál nian hodi muda sentru ne’e mai Manatuto Vila. Depois maka sei fó kompeténsia ba edukasaun munisipál kontinua halo avaliasaun ba profesór sira ne’ebé maka la tuir ona formasaun ne’e.
Sentru ne’e loke iha 2020 ne’ebé uza de’it sala aula eskola nian ba atividade formasaun ba dalen portugeza.
Jornalista: Tomé Amado
Editora: Maria Auxiliadora
